Арцыбіскуп Мюлер: з мужнасцю прызнаваць сваю прыналежнасць да Касцёла
Да мужнасці ў прызнанні
сваёй прыналежнасці да Касцёла заклікаў прэфект Кангрэгацыі Веравучэння. 12 мая, падчас
урачыстасцяў у гонар св. Станіслава ў польскім Кракаве, арцыбіскуп Герхард Людвіг
Мюлер звярнуў увагу, што сёння ўсё часцей гучыць меркаванне з боку некаторых колаў,
што Касцёл не патрэбны, што ён – гэта чужая рэальнасць, што Касцёл не паспявае за
сучаснасцю. Іерарх заклікаў не паддавацца падобнай хлусні. “Сёння трэба з моцай вызнаваць
сваю веру! Сёння не хопіць проста прамаўчаць. Любоў да Бога павінна матываваць нас
да мужнасці і сведчання жыцця”, - сказаў у сваёй гаміліі падчас галоўнай св. Імшы
ватыканскі іерарх.
Арцыбіскуп Мюлер падкрэсліў, што св. Станіслаў “жыў Евангеллем
і смела абвяшчаў яго”. Па яго прыкладу, “не можна сёння хаваць галаву ў пясок. (...)
Сённяшнія вучні Добрага Пастыра не могуць не слухаць яго і і ісці за некім іншым”,
- нагадаў іерарх. “Мы разумеем, што не можна саромецца крыжа, не можна склаўшы рукі
глядзець як крыўдзяць Хрыста, не можна згадзіцца на адмову ад Бога, не можна пагадзіцца
на закрыццё веры ў так званай “вобласці асабістага жыцця”, - дадаў ён.
Арцыбіскуп
адзначыў, што сёння трэба мужнасці ў вызнанні прыналежнасці да Касцёла, які з’яўляецца
адзіным, святым, паўсюдным і апостальскім, які з’яўляецца цудоўным і ёсць нашым домам.
Прэфект Кангрэгацыі Веравучэння заклікаў сабраных на ўрачыстасці ў гонар св. Станіслава
супрацьстаяць таму, што абражае чалавечую годнасць і зневажае звычаі здаровага грамадства.
Гэта ўсё, на яго думку, часам можа пагражаць існаванню чалавечай супольнасці і агульнаму
дабру.