Imzot Çeli: Kisha në rrjetet shoqërore për të ecur së bashku me to. Tweet të shumta
për Papën Françesku
Dje u kremtua Dita e 47-të Botërore e Komunikimeve Shoqërore me temë “Rrjetet shoqërore:
porta të së vërtetës e të fesë, hapësira të reja të ungjillëzimit”. Në mesazhin për
këtë ditë, Benedikti XVI shkruante se rrjetet shoqërore në internet “po kontribuojnë
në krijimin e një forumi të ri publik, ku njerëzit shkëmbejnë idetë e ku mund të marrin
jetë forma të reja bashkësish”. Pra, vlerësimi i Kishës Katolike për rrjete si Facebook
e Twitter është pozitiv, por pjesëmarrja në to kërkon edhe përgjegjësi e përkushtim
ndaj së vërtetës, siç nënvizon kryetari i Këshillit Papnor për Komunikimet Shoqërore,
imzot Klaudio Maria Çeli: Për Kishën, mendoj
se përfaqësojnë një sfidë e një mundësi, pasi rrjetet shoqërore janë vërtet një ambient
jete, në të cilin ne jemi të thirrur ta bëjmë të pranishëm mesazhin e Jezusit; dishepujt
e Zotit janë të thirrur të japin dëshmi në rrjet, për vlerat në të cilat besojnë.
Ata duhet ta jetojnë me vërtetësi e me përgjegjësi përfshirjen e tyre në to. Kjo është
sfida. Ka mundësi kështu që edhe ata, që janë larguar, që i kanë humbur marrëdhëniet
e thella me Zotin, mund të gjejnë një ofertë konkrete, një paraqitje serioze, plot
respekt, mund të ndeshen me kriteret për jetën. Në mesazhin e Benediktit XVI
vihen në dukje disa aspekte e këshilla si largimi nga sensacionalizmi, nga gjithçka
është etje për popullaritet… Do të thosha se ky është qëndrimi i Kishës. Ne
nuk bëjmë propagandë, kumtimi i Ungjillit të Krishtit nuk është ‘publicitet’. Është
fjala për të ndarë me të tjerët udhën e jetës, kriteret e krishtera, që në thelb,
janë sintezë e marrëdhënieve ndërmjet jetës personale e mesazhit të Jezusit. Është
shumë e rëndësishme kjo: prania jonë nuk është kumtim ‘formal’ i Ungjillit - si për
shembull me citime nga Ungjilli – nuk është kjo… Mendoj se pikërisht përmes rrjetit
shoqëror, jemi të thirrur të tregojmë si takohet jeta e secilit me Jezusin dhe Ungjillin,
pra, si shndërrohet jeta e secilit. Mesazhet e Papës Françesku për gjithë botën janë
të këtij lloji; si ai para disa ditësh, kur thoshte se nuk ekziston trishtimi e malinkonia
për të krishterin, sepse jeta e tij lidhet me Jezu Krishtin, apo kur thoshte se lotët
e vuajtjes janë si xham zmadhues, që na ndihmojnë të zbulojmë praninë e Jezusit. Rrjeti
shoqëror bëhet pra mundësi shkëmbimi, çast në të cilin, me vërtetësi dhe menjëherë,
komunikojmë thelbin e jetës sonë. Folët për tweet-et e Papës Françesku. I filloi
Benedikti XVI e qenë sinjali se edhe Vatikani dëshiron të marrë pjesë në rrjetet shoqërore
në internet. Cila është perspektiva? Mendoj se duhet të vazhdojmë në këtë linjë.
Tweet-et janë shtuar e Papa Françesku duket se ka dëshirë t’i vazhdojë. Tweet-i në
vetvete përdor një gjuhë të re: është gjuha e përhapur sidomos ndër të rinj. Mesazhet
e Papës ri-tweetohen pastaj nga ndjekësit e faqes së tij. Miliona njerëz e marrin
këtë mesazh në celular e, megjithëse i shkurtër, ai është me përmbajtje të pasur,
nxit dhe frymëzon udhën e jetës. Pra, e ardhmja e Kishës, e mesazhit të Krishtit,
është edhe përhapja në rrjet, apo jo? Pikërisht ashtu. Nuk mund të mohohet se
përsa i përket ungjillëzimit, udha kryesore është ajo e bashkësisë, por rrjeti shoqëror
mund të jetë vend i privilegjuar, ku secili mund të gjejë diçka, që ka humbur, ose
që e ka lënë diku udhës. Mendoj se është përgjegjësi e jona ta bëjmë këtë mesazh të
shndrisë sa më shumë të jetë e mundur, në mënyrë që të bëhet pikë referimi për të
gjithë ata njerëz, të cilët kërkojnë një jetë me kuptim.