2013-05-11 13:01:08

Սուրիոյ Տագնապի Եւ Իրանի Հիւլէական Թղթածրարի Լուծումները Քաղաքական Են Եւ Ոչ Թէ Զինուորական» Կ՛ըսէ Հէյկըլ


Միացեալ Նահանգներու պաշտպանութեան նախարար Չաք Հէյկըլ յայտնեց, որ Միջին Արեւելքի հարցերուն, մասնաւորաբար Սուրիոյ տագնապին եւ Իրանի հիւլէական թղթածրարին լուծումները քաղաքական են եւ ոչ թէ զինուորական:
Փենթակոնի ղեկավարը Միջինարեւելեան քաղաքականութեան Ուաշինկթըն հիմնարկին մէջ արտասանած իր խօսքին մէջ յայտնեց, որ Միջին Արեւելքի մէջ տագնապներու աւելի ազդու եւ յարատեւ լուծումները քաղաքական են եւ ոչ թէ զինուորական` աւելցնելով, որ Միացեալ Նահանգներու դերը դիւանագիտական միջոցներով եւ իրենց դաշնակիցներուն հետ համակարգաբար զարգացումներու ընթացքին ազդելն է:
Բրիտանիոյ արտաքին գործոց նախարարութեան մէջ Միջին Արեւելքի եւ Հիւսիսային Ափրիկէի հարցերու պատասխանատու Ալիսթըր Փիրթ քուէյթեան «Քունա» լրատու գործակալութեան յայտնեց, որ Բրիտանիա կ՛ողջունէ այս ամսուան վերջաւորութեան Սուրիոյ տագնապին շուրջ միջազգային խորհրդաժողով մը կազմակերպելու ռուս-ամերիկեան համաձայնութիւնը: Ան ընդգծեց, որ «բոլորը Սուրիոյ տագնապին քաղաքական եւ ոչ թէ զինուորական լուծում մը կ՛ուզեն»:
Փիրթ ըսաւ, որ իր երկիրը տակաւին այն կարծիքին է, թէ քիմիական զէնքը հաւանաբար սուրիական կառավարութեան կողմէ օգտագործուած է` նշելով, որ «Բրիտանիա այդ տպաւորութեան շուրջ փաստեր ներկայացուց ՄԱԿ-ին»: Ան քիմիական զէնքի օգտագործումը նկատեց «շատ վտանգաւոր» հարց մը, զոր պէտք է ճիշդ ձեւով հետաքննութեան ենթարկել` աւելցնելով, որ «մենք արդիւնքը պիտի չգիտնանք, մինչեւ որ ՄԱԿ իր հետաքննութիւնը աւարտէ»:








All the contents on this site are copyrighted ©.