«Ասատ Չի Կրնար Փոխանցման Կառավարութեան Մաս Կազմել» Կ՛ըսէ Քերրի
Սպիտակ տան բանբեր Ճէյ Քառնի յայտնեց, որ Սուրիոյ ապագան չի կրնար նախագահ Պաշշար Ասատը
ներառել` նշելով, որ Ասատ իր օրինականութիւնը ամբողջովին կորսնցուց եւ պէտք է իշխանութենէն
հեռանայ, իսկ սուրիացի ժողովուրդը պէտք է բանակցի փոխանցման վարչական մարմինի մը կազմութեան
եւ վարչակարգի տարրերուն շուրջ: Պատասխանելով այն հարցումին, թէ չորեքշաբթի Միացեալ
Նահանգներու արտաքին գործոց նախարար Ճոն Քերրիի այն յայտարարութիւնը, թէ Ասատի հեռացումը
սուրիացի ժողովուրդին ձգուած է, արդեօք Ասատի նկատմամբ Միացեալ Նահանգներու քաղաքականութեան
փոփոխութի՞ւն մըն է` ան ըսաւ. «Կը կարծեմ, թէ ան արտայայտեց այն տեսակէտը, որ միշտ յայտնած
ենք` թէ Ասատ չի կրնար ապագային Սուրիոյ ղեկավար ըլլալ, եւ թէ ան պէտք է հեռանայ. այդ
է նաեւ սուրիացի ժողովուրդին կարծիքը»: Աւելի ուշ Քերրի իր կարգին Յորդանանի արտաքին
գործոց նախարար Նասեր Ժաուտաթի հետ իր հանդիպումէն առաջ յայտարարեց, որ «Սուրիոյ նախագահ
Պաշշար Ասատ չի կրնար սուրիական փոխանցման կառավարութեան մաս կազմել»: Արաբական լիկայի
ընդհանուր քարտուղար Նապիլ Արապի սուրիական կառավարութեան, ընդդիմադիր Ազգային համաձայնական
մարմինին եւ ամբողջ սուրիական ընդդիմութեան կոչ ուղղեց` «ընդառաջելու միջազգային խորհրդաժողով
կազմակերպելու ռուս-ամերիկեան ջանքին»` պահանջելով, որ անոնք գործադիր ամբողջական լիազօրութիւն
ունեցող կառավարութեան մը կազմութեան համար օգտուին այս առիթէն: Միւս կողմէ` Յորդանանի
վարչապետ Ապտալլա Նսուր նշեց, որ «սուրիական կացութիւնը շատ բարդ է, մասնաւորաբար Դամասկոսի
դէմ իսրայէլեան վերջին յարձակումներէն ետք»: