Հայաստան Մասնակցած է Տուպայի Ամենամեայ Ներդրումային Համաժողովին
ՀՀ տնտեսութեան նախարարութիւնը, ԱՄԷ-ի մէջ ՀՀ դեսպանութեան եւ Զարգացման հայկական գործակալութեան
աջակցութեամբ ՀՀ պաշտօնական պատուիրակութիւնը եւ մօտ տասը հայկական մասնաւոր ընկերութիւններ
մասնակցած են Ապրիլ 30-Մայիս 2 Տուպայի Ամենամեայ ներդրումային երրորդ համաժողովին (Annual
Investment Meeting, Dubai-2013): Այս մասին կը հաղորդեն ՀՀ արտաքին գործոց նախարարութեան
մամուլի, տեղեկատւութեան եւ հասարակայնութեան հետ կապի վարչութենէն: ՀՀ պաշտօնական
պատուիրակութեան ղեկավար, ՀՀ տնտեսութեան փոխնախարար Տիգրան Յարութիւնեան համաժողովին
ծիրէն ներս հանդիպում ունեցած է ԱՄԷ տնտեսութեան նախարար Սուլթան պն Սաաիտ ալ-Մանսուրի
հետ: Հանդիպման ընթացքին քննարկուած են երկկողմ առեւտրատնտեսական յարաբերութիւններուն
առնչուող հարցեր, մասնաւորապէս հայկական` արտադրատեսակներու` ԱՄԷ արտահանման ծաւալներու
մեծնալուն հնարաւորութիւնները: Համաժողովին զուգահեռ բացուած է նաեւ ցուցահանդէս:
Հայկական տաղաւարին մէջ ներկայացուած են արտահանման ներուժ ունեցող հայկական ընկերութիւններու
արտադրատեսակները: Մայիս 2-ին տեղի ունեցած է Հայաստանին նուիրուած շնորհանդէսը, որուն
ներկայ եղած են ԱՄԷ զարգացման եւ միջազգային համագործակցութեան փոխնախարար Ապտալլահ ալ-Սալեհին: Շնորհանդէսէն
ետք փոխնախարար ալ-Սալեհի ԱՄԷ-ի մէջ ՀՀ դեսպան Գեղամ Ղարիպճանեանի ուղեկցութեամբ այցելած
է հայկական տաղաւար: Նշեալ ձեռնարկներու ծիրէն ներս տեղի ունեցած են բազմաթիւ գործարար
հանդիպումներ եւ ձեռք բերուած են համագործակցութեան շուրջ համաձայնութիւններ, ինչպէս
նաեւ ստորագրուած է փոխըմբռնման յուշագիր` հայկական եւ օտարերկրեայ մասնաւոր ընկերութիւններու
միջեւ: Դեսպան Ղարիպճանեան հանդիպում ունեցած է նաեւ համաժողովին մասնակցելու նպատակով
Տուպայ մեկնած Ռումանիոյ տնտեսութեան նախարար Վարուժան Ոսկանեանի գլխաւորած պատուիրակութեան
անդամներուն հետ: Տուպայի Ամենամեայ ներդրումային համաժողովը տեղի ունեցած է ԱՄԷ փոխնախագահ,
վարչապետ եւ Տուպայի էմիրութեան կառավարիչ շէյխ Մուհամմատ պն Ռաշէտ ալ-Մաքթումի հովանաւորութեամբ:
Համաժողովին մասնակցած է 80 երկիր եւ հետեւեալ ոլորտները ներկայացնող 220 ներդրումային
ընկերութիւն` գիւղատնտեսութիւն, սնունդի վերամշակում, արդիւնաբերութիւն, ուժանիւթ, քիմիական
արդիւնաբերութիւն, դրամատնային եւ ելեւմտական ապահովագրութիւն, զբօսաշրջութիւն, հեռահաղորդակցութիւն,
շինարարութիւն, անշարժ գոյքի առք եւ վաճառք, հանքարդիւնաբերութիւն, իրաւաբանական խորհրդատւութիւն
եւ այլն: