Удзельнікі “Падворку язычнікаў” паразважаюць над спадчынай Русо
6 мая ў італьянскай
Балонні пачаўся чарговы этап ініцыятывы Папскай рады па культуры пад назвай “Падворак
язычнікаў”. Мерапрыемствы ў яе рамках прадугледжваюць сустрэчы паміж веруючымі і няверуючымі
прадстаўнікамі розных галін культуры, навукі і мастацтва. Яны абмяркоўваюць важныя
грамадскія і філасофскія пытанні і разважаюць аб ролі Бога і трасцэндэнтных каштоўнасцяў
у жыцці людзей. Сустрэча, якая пачалася ў Балонні, упершыню прысвечана гістарычнай
постаці – французскаму філосафу Жан-Жаку Русо. Дакладней, у цэнтры ўвагі ўдзельнікаў
мерапрыемства будуць рэлігійныя погляды гэтага мысліцеля эпохі Асветы, а таксама месца
Бога ў яго творчасці.
У форуме прыме ўдзел, між іншых, былы старшыня Папскай
рады па культуры кардынал Поль Пупар. Ён засяродзіцца менавіта на ўплыве Русо на веру
сучаснага чалавека, а не на больш традыцыйныя для гэтага філосафа тэмах, такія як
дэмакратыя, адукацыя ці правы чалавека. Паводле іерарха, пытанне “Дзе сапраўдны я
?”, якое Русо паставіў тры стагоддзі таму, застаецца актуальным і сёння і патрабуе
глыбокага разважання.
Серыя сустрэч прысвечаных вядомым філосафам працягнецца
ў чэрвені ў французскім Марсэле. Тут удзельнікі “Падворку язычнікаў” будуць разважаць
над літаратурнай і філасофскай спадчынай Камю і Рыкёра. Восенню Папская рада па культуры
плануе правесці сустрэчы ў Варшаве, Празе і Берліне. А 7-8 мая, мерапрыемства ўпершыню
адбудзецца па іншы бок Антлантычнага акіяна – у Мексіцы.