Në meshën me rekrutët e rinj, kardinali Bertone nxorri në pah figurën e grave, që
ndikojnë në jetën e rojeve zvicerane
Në homelinë e meshës, me rastin e betimit të sotëm të 35 rojeve të reja zvicerane,
Sekretari i Shtetit të Vatikanit, kardinali Tarçizio Bertone, duke komentuar leximet
e ditës, nxorri në pah figurën e grave, që ndikojnë në jetën e rekrutëve të rinj të
Rojeve Zvicerane. U nis nga figura e Lidies, gruas që dëgjonte Shën Palin Apostull,
duke e kthyer shtëpinë e vet në kishën e parë të kontinentit evropian. “Më
6 maj 1527 – kujtoi kardinali Bertone – bashkëshortja e komandantit Kaspar Rëjst,
Elizabeta Klingler… pa të shoqin, të plagosur, sjellë në shtëpi nga ushtarët e vet,
të masakrohej mizorisht para syve të saj. Armiqtë kishin arritur të hynin edhe në
lagjen zvicerane e në shtëpitë e rojeve. Ajo mbijetoi, por u plagos rëndë, ndërsa
përpiqej ta mbronte të shoqin nga dhuna e burrave”. Por edhe në kohë paqeje,
vazhdoi kardinali, janë të shumta gratë, që u japin zemër burrave për t’iu përgjigjur
thirrjes së Papës, janë të shumta nënat e gjyshet, që dinë të transmetojnë fenë, e
s’mund të harrohet roli i murgeshave albertine, që gatuajnë çdo ditë për rojet zvicerane,
por edhe mësueset e italishtes e personeli ndihmës femëror. “Mund të themi pa
e tepruar – nënvizoi kardinali Bertone – se në historinë e Rojeve Zvicerane Papnore,
ashtu si në historinë e ungjillëzimit të kontinentit evropian, del në pah roli i pazëvendësueshëm
i shumë “Lidieve””. Më pas, tema e dytë e homelisë. Jezusi, në Ungjillin e
sotëm, premton ngushëllimin e Shpirtit Shenjt për dishepujt e vet, të cilët i paralajmëron
se do të persekutohen. Nuk i lë vetëm, pra, por u lë Shpirtin Shenjt. Edhe në fund
të formulës së betimit, çdo roje zvicerane kërkon “që Zoti e Shenjtorët pajtorë të
më ndihmojnë”. Mendoj e shpresoj, u tha kardinali Bertone, duke kujtuar edhe këshillat
e Papës Françesku për këtë, se jeni të bindur ta pasuroni jetën tuaj personale, duke
e ndjerë në praktikë efektin e kësaj lutjeje të përvuajtur, që e bën të pranishëm
Shpirtin Shenjt.