Betohen 35 roje të reja zvicerane në Vatikan. Papa: “Feja është thesari më i çmuar,
që keni”
Sot pasdite, në Oborrin e Shën Damazit në Vatikan, zhvillohet ceremonia e betimit
të 35 rojeve të reja zvicerane, në shërbim të Papës. Është një traditë, që përsëritet
çdo 6 maj dhe kujton flijimin e 147 ushtarëve papnorë, rënë gjatë “Plaçkitjes së Romës”,
pikërisht si sot, në vitin 1527. Rekrutimi i të rinjve në gjirin e Rojeve Zvicerane
është edhe një mënyrë nderimi për këta ushtarë, të cilët dhanë jetën për të mbrojtur
Papën Klementi VII nga sulmi i lancikenekëve. Vërtet, ata u përmendën në meshën e
sotme, në Bazilikën e Shën Pjetrit, në orën 7.30 e më pas, me një akt përkujtimor
në Sheshin e Protomartirëve Romakë. Pas mesditës, rojet zvicerane u pritën nga
Papa Françesku, i cili i falenderoi me gjithë zemër: “Çdo ditë mund ta provoj
personalisht përkushtimin, profesionalitetin dhe dashurinë, me të cilën kryeni shërbimin
tuaj. Falenderoj veçanërisht familjet, që e kanë pranuar me mirëdashje vendimin tuaj
për këtë shërbim në Vatikan dhe ju mbështesin me përzemërsi e lutje”. Për t’i
shërbyer Kishës e Papës, vazhdoi Ati i Shenjtë, duhet të kesh besim të fuqishëm në
Krishtin: “Është feja, që ju ka sjellë në Romë. Fe, që e keni marrë në familje,
e keni kultivuar në famulli; fe, që tregon lidhjen e katolikëve zviceranë me Kishën…
Feja është thesari më i çmuar, që keni”. Papa Bergolio i ftoi rojet zvicerane
ta jetojnë periudhën e shërbimit në Romë me frymën e vëllazërisë së sinqertë, duke
e ndihmuar njëri-tjetrin për të përmbushur kërkesat e jetës së krishterë e për të
kapërcyer çastet e vështira. Rojet zvicerane, vazhdoi Ati i Shenjtë, e dëshmojnë fenë
me buzagaz e mirësi. Sa e rëndësishme është kjo për të gjithë njerëzit, që kalojnë
në Vatikan, por edhe për ata, që punojnë e, edhe për mua vetë, theksoi Papa Françesku.
Lutuni për njëri-tjetrin, i këshilloi, e zbatojeni në praktikë, duke e ndihmuar njëri-tjetrin,
bashkimin me Jezusin, që e merrni përmes Eukaristisë: “Kur disa prej jush betohen
sot të kryejnë me besnikëri shërbimin e tyre në gjirin e Rojeve e të tjerët e përtërijnë
këtë betim në zemër, mendoni se edhe shërbimi juaj është dëshmi për Krishtin, i cili
ju kërkon të jeni njerëz të vërtetë e të krishterë të vërtetë, protagonistë të jetës
suaj… Mos harroni se Zoti ecën me ju: ky është mendim, që i bën mirë shpirtit… Ju
uroj nga zemra ta ndjeni gjithnjë gëzimin dhe ngushëllimin, që vjen nga prania e Tij
e shndritshme dhe e mëshirshme”.