Святы Айцец да каталіцкіх брацтваў: быць кузніцамі святасці
Евангелізацыйнасць,
эклезіяльнасць і місіянерства – на гэтыя тры аспекты звярнуў увагу папа Францішак
5 мая падчас св. Імшы з удзелам членаў каталіцкіх брацтваў, якія прыбылі ў Вечны горад
з розных краін свету. Святы Айцец падкрэсліў, што брацтвы з’яўляюцца “традыцыйнай
рэальнасцю Касцёла, якая на працягу апошніх гадоў атрымала абнаўленне і была па-новаму
адкрыта”. У першую чаргу Папа нагадаў, пра заклік свайго папярэдніка Бэнэдыкта XVI
да евангелізацыйнай ролі брацтваў. “Абапірайцеся заўсёды на Хрыста, невычэрпную крыніцу,
умацоўвайце вашу веру, клапаціцеся пра духоўную фармацыю, супольную і асабістую малітву,
літургію. На працягу стагоддзяў брацтвы былі кузніцамі святасці для многіх людзей,
якія ў прастаце жылі інтэнсіўнымі адносінамі з Панам. З рашучасцю ідзіце да святасці;
не задавальняйцеся абыякавым хрысціянскім жыццём, але няхай ваша прыналежнасць будзе
стымулам, перш за ўсё для вас, больш любіць Езуса Хрыста”, - сказаў Пантыфік.
Таксама
Папа падкрэсліў, што народная пабожнасць, гэта шлях, які вядзе да самага важнага,
калі рэалізоўваецца ў Касцёле, у глыбокай еднасці з пастырамі. “Касцёл вас любіць!
Будзе актыўна прысутнымі ў супольнасці, як жывыя клеткі, жывыя камяні”, - заклікаў
Святы Айцец. “У парафіях, дыяцэзіях, будзьце сапраўднымі лёгкімі веры і хрысціянскага
жыцця, свежым паветрам! На гэтай плошчы, я бачу шмат парасонаў, колераў і знакаў.
Такі ён Касцёл: вялікае багацце адметнасцяў і выразаў ў тым, што вядзе да адзінства;
адметнасці прыведзеныя да адзінства ў сустрэчы з Хрыстом”, - сказаў Папа.
Нарэшце,
апошнім пунктам на які звярнуў увагу Пантыфік тычыўся місіянерскай ролі брацтваў.
“Вы маеце спецыфічную і важную місію – падтрымліваць жывымі адносіны паміж верай і
культурамі народаў, да якіх прыналежаце, і робіце гэта праз народную пабожнасць”,
- сказаў Святы Айцец. Ён заклікаў быць сапраўднымі евангелізатарамі і знаходзіцца
побач з тымі хто перажывае цяжкасці. “Будзьце місіянерамі міласэрнасці Бога, які заўсёды
прабачае, чакае і вельмі любіць”, - заклікаў Святы Айцец. “Евангелізацыйнасць, эклезіяльнасць
і місіянерства. Тры словы. Не забудзьце іх!”, - сказаў папа Францішак.