Mianmar: nacionalizmi fetar e dora e ushtrisë në dhunën ndërfetare
Një lëvizje e murgjërve birmanë po i fryn zjarrit të tensionit ndërmjet budistëve
dhe myslimanëve, në Mianmar. Gjatë muajve të fundit, vendi është kthyer në teatër
dhune, e cila ka shkaktuar dhjetra të vdekur e mijëra të shpërngulur, në zona të ndryshme.
Ndër protagonistët kryesorë të kësaj vale anti-myslimane, që i fton njerëzit të bojkotojnë
dyqanet dhe aktivitetet e ndjekësve të Muhametit, edhe një murg i famshëm, që pavarësisht
se e mban veten si “njeri të paqes”, njihet me emrin “Bin Ladeni birman”. Me parrullën
“budistë të bashkuar kundër kërcënimit islamik”, murgu përfaqëson një lëvizje në rritje
– fushatën “969” – në të cilën tri shifrat janë pasqyrë e virtyteve të Budës, mësimeve
të tij dhe bashkësisë së murgjërve. Si pasojë e kësaj fushate, xhiroja e disa dyqaneve
myslimane ka rënë edhe me 75%. E nuk vlejnë aspak thirrjet për t’i dhënë fund dhunës
nga ana e bashkësisë ndërkombëtare dhe e kryeipeshkvit katolik të Jangonit, imzot
Çarls Bo. Sipas analistëve, fushata i ka rrënjët së pari, në opinionin e përhapur
se myslimanët kanë sukses në biznes, në një gjendje të përgjithshme aspak të mirë
ekonomike. Së dyti, ajo varet nga ndjenjat nacionaliste të birmanëve, që janë mjaft
të fuqishme në gjirin e murgjërve budistë, konsideruar gjithnjë patriotë, në mbrojtje
të identitetit kombëtar. Por, sidomos, rrënjët janë në mentalitetin anti-islamik të
krijuar gjatë diktaturës së gjeneralit Ne Uin, mbetjet ushtarake të së cilës mendohet
se po orkestrojnë dhunën dhe tensionin aktual për të destabilizuar vendin e për të
vënë në rrezik reformat politike drejt demokracisë.