Канцлер Германіі Ангела
Меркель у інтэрв’ю нямецкім каталіцкім дыяцэзіяльным выданням адзначыла, што як лютэранка
яна вельмі цэніць “прыгожыя малітоўныя абрады католікаў”. “Малітва - гэта размова
з Богам, хаця яна з’яўляецца вельмі асабістай справай”, - лічыць палітык. Яна запэўніла
таксама аб сваёй малітве за папу Францішка. Кіраўнік нямецкага ўрада прызналася, што
ёй вельмі спадабалася тое, што ў першай прамове пасля абрання на Пасад св. Пятра Францішак
прасіў у вернікаў малітваў за сябе. “Гэта сведчыць пра тое, як ён адданы ўсім людзям”
- сказала Меркель. Яна таксама пацвердзіла, што ў дзень інаўгурацыі пантыфікату Папа
папрасіў яе памаліцца за яго. “Буду маліцца за Папу як лютэранка” , - адзначыла яна.