“L’Osservatore Romano” пра ватыканскі кляштар “Mater Ecclesiae”
Кляштар “Mater Ecclesiae”,
у які 2 мая пераедзе Бэнэдыкт XVI з’яўляецца сучаснай пабудовай на тэрыторыі Ватыканскіх
садоў. З лістапада 2012 г. у ім праводзіліся рамонтныя працы, але да гэтага часу тут
жылі законніцы, якія сваёй малітвай падтрымлівалі Папаў. “Асаблівая мэта гэтай супольнасці
– служэнне малітвы, адарацыі, праслаўлення і аднаўлення. Каб быць, такім чынам малітвай
у цішыні і адзіноце, дзеля падтрымкі Святога Айца ў яго штодзённым клопаце пра ўвесь
Касцёл”, - гаворыцца ў статуце кляштара. Яго будынак узводзіўся на працягу 1992-1994
гг. на месцы невялікага садовага дома, пабудаванага на пачатку ХХ ст. Першапачаткова
ён прызначаўся для Ватыканскай жандармерыі, але затым яго гаспадары некалькі разоў
змяняліся: ад кіраўніцтва Ватыканскага радыё да розных ватыканскіх службаў, адзначае
сённяшняе “L’Osservatore Romano”
На пачатку 1990-х гг. бл. Ян Павел ІІ прапанаваў
прызначыць будынак для законніц, якія б сваёй малітвай падтрымлівалі Папу. Было вырашана,
што у кляштары будуць змяняць адна адну прадстаўніцы розных жаночых манаскіх супольнасцяў.
Першапачаткова гэта адбывалася кожныя пяць гадоў, а затым тэрмін быў скарочаны да
трох. Выбар чарговай супольнасці зацвярджаў сам Папа, а дапамагала яму Кангрэгацыя
па справах Інстытутаў кансэкраванага жыцця і Таварыстваў апостальскага жыцця. З 1994
па 2012 г. у ватыканскім манастыры змянялі адна адну прадстаўніцы чатырох самых буйных
кляўзуровых манаскіх ордэнаў: кларысы, кармеліткі босыя, бэнэдыктынкі і візіткі.
Побач
з кляштарам знаходзіцца невялікі сад у якім законніцы вырошчвалі садавіну і агародніну
да стала Пантыфіка. Акрамя таго, яны займаліся рэстаўрацыяй старажытных пергаментаў,
мітраў і арнатаў для біскупаў і Пантыфіка. Таксама законніцы клапаціліся пра сад ружаў,
які любіў наведваць Бэнэдыкт XVI. З сённяшняга дня, Папа на пенсіі асабіста будзе
выконваць малітоўную місію, у гэтым самым месцы.