Imzot Anxhelo Beçiu flet për perspektivën e reformës së Kuries Romake.
Është tepër shpejt të hamendësosh cila do të jetë ardhmëria e Kuries Romake. Kështu
përgjigjet imzot Anxhelo Beçiu, zëvendës-sekretar i Sekretarisë së Shtetit të Vatikanit,
i pyetur për ngritjen e grupit të tetë kardinajve, zgjedhur nga Papa Françesku për
të studiuar planin e rishikimit të kushtetutës apostolike Pastor Bonus lidhur me Kurien
Romake. Imzot Beçiu, në mikrofonin tonë:
Përgjigje: - Që
do të bëhet reforma, kjo është sigurtë. Papa e dëshiron e ka kërkuar kontributin e
njerëzve të ndryshëm, për t’i paraqitur vërejtjet e tyre. Kur do të bëhet kjo, nuk
dihet. Sigurisht do të jetë objekt diskutimi e këshillash, që do t’i japin Atit të
Shenjtë tetë kardinajtë, në takimin e tyre të parë. Ndërkaq Papa dëshiron që kush
është në Kurie, të punojë me të njëjtin përkushtim e në heshtje, e po ashtu, kush
dëshiron të sjellë kontribut a të japë kontribut, mendime për reformën e Kuries, ta
bëjë këtë me maturi të madhe, në heshtje e, sidomos, nënvizon Papa, në lutje.
Pyetje:
- Është folur edhe për mundësinë e reformimit të IOR (Institutit për Veprat Fetare).
E vërtetë kjo? Përgjigje: - Për këtë Ati i Shenjtë më tha shprehimisht:
unë e vlerësoj IOR-in për shërbimet që ka bërë e pastaj e di se po punohet për më
shumë transparencë, për ta bërë IOR-in më “të paraqitshëm”, nëse ndokush mendon se
nuk u paraqitka si duhet. E prej këndej, Papa u beson njerëzve, që janë ngarkuar për
t’ia përshtatur Institutin standardeve, në përkim me instancat e ndryshme ndërkombëtare.