Pas një periudhe dy mujore kaluar larg Vatikanit, në rezidencën verore të papëve në
Kastelgandolfo, Papa i nderit Ratcinger u prit me krah hapur nga Papa Bergoglio,
i cili e priti paraardhësin ma një përqafim vëllazëror para kuvendit ‘Mater Ecclesiae’,
pas bazilikës së Shën Pjetrit, ku do të banojë. Dy Papët janë përshëndetur personalisht
në takimin historik në Kastelgandolfo, më 23 marsin e kaluar. Kështu, për herë
të parë në histori, nga dita e sotme 2 maj, brenda Mureve Leoniane të Vatikanit do
të jenë dy Papë. Papa i nderit, Benedikti XVI, i cili sot pasdite është kthyer
në Vatikan nga Kastel Gandolo, ku qëndroi që nga dita e fundit e papnisë së tij, 28
shkurti i kaluar. Në heliportin e Vatikanit, Benedikti XVI u prit nga dekani i Kolegjit
kardinalor, kardinali Angelo Sodano, nga zëvendës-sekretari i Sekretarisë së Shtetit
të Vatikanit, imzot Beçiu, nga sekretari për Marrëdhëniet me Shtetet, imzot Mamberti,
nga presidenti i Guvernatoratit të Vatikanit, kardinali Bertello e nga sekretari i
Quvernatoratit imzot Sciacca. Siç thamë, Papa Françesku e priti Benediktin XVI
në hyrje të manastirit ‘Mater Ecclesiae’, pra pranë ish kuvendit të vogël, që gjendet
pas Bazilikës së Vatikanit, në mesin e territorit të Vatikanit, kuvend që është rindërtuar
për qenë pikërisht shtëpi e Papës së nderit, ku nga dita e sotme do të banojë Papa
Ratcinger, 86 vjeç, së bashku me sekretarin personal imzot Gaenswein, e katër murgesha
“memores domini”, që kujdesën për mirëmbajtjen e këtij ish kuvendi.Kështu pas dy muajsh,
Papa i nderit, Benedikti XVI gjendet përsëri në Vatikan, për të banuar, siç është
njoftuar prej kohe, në kuvendin ‘Mater Ecclesiae’. Ky kuvend, është ndërtuar më 1992
nga Papa Gjon Pali II, në kopshte të Vatikanit, për bashkësitë murgarë femërore, pra
për murgeshat e jetës kundruese. E këtu nga vitit 1994 filloi edhe brenda territorit
të Selisë së Shenjtë misioni i ri e njëkohësisht i lashtë, ai i lutjes kundruese të
murgeshave të urdhrave të ndryshëm, që pasonin njëri tjetrit çdo pesë vjet. E tani,
në atë manastir, ku aq shumë janë bërë lutje për të, tani do të jetë ai, Papa i nderit
që do të lutet për pasardhësin e tij e për mbarë Kishën. Benedikti XVI do të kalon
ditët e tij në lutje e kundrim, në një “mision të veçantë” e tejet të rëndësishëm
për Kishën e ditëve tona.