Benedikti XVI u kthye sot në Vatikan. E priti, Papa Françesku
Benedikti XVI u kthye në Vatikan, pas dy muajsh qëndrimi në Kastelgandolfo, rezidenca
verore e papëve. Jozef Racinger u nis me helikopter në orën 16.30 për të mbërritur
në kuvendin “Mater Ecclesiae”, ku do të banojë tani e tutje, së bashku me sekretarin
e tij, prefektin e Shtëpisë Papnore, imzot Georg Genshvajn dhe me katër “memores Domini”,
murgesha, që e kanë shoqëruar gjatë këtyre viteve. Në manastirin e klauzurës,
që u ristrukturua kohët e fundit, Papa i nderit u prit nga Papa Françesku. Aty do
të lutet, së bashku me vizitandinet, për të gjitha nevojat e Kishës e të botës. Kujtojmë
se kuvendi, i ngritur me dëshirën e Papës së lum Gjon Pali II para 20 vjetësh, ka
qenë seli e udhërave më të njohura të klauzurës, duke filluar nga klariset, tek karmelitanet
e zbathura, benedektinet e, tani së fundi, vizitandinet. Ndoshta jo rastësisht,
dita e zgjedhur për kthimin në Vatikan është kjo e sotmja, 2 maj, kur në Akuila të
Italisë filluan kremtimet për 700-vjetorin e ngritjes në nderimet e elterit të Papës
Çelestini V. Edhe ai, ashtu si Benedikti XVI, pati dhënë dorëheqjen nga papnia, pati
abdikuar, për të mirën e Kishës e të Popullit të Zotit. Më 28 shkurtin e këtij
viti, Benedikti XVI, u largua nga Vatikani, duke shënuar fillimin e Selisë Vakante.
I pati përshëndetur besimtarët, që e pritën në Kastelgandolfo, duke e quajtur veten
“shtegtar i thjeshtë”, në etapën e fundit të jetës, por gjithnjë pranë Kishës me zemër,
dashuri e lutje. Më 23 mars, u takua me Papën Françesku, i sapozgjedhur në fronin
e Shën Pjetrit: një takim historik mes “vëllezërish”, të cilët kanë folur edhe herë
të tjera me telefon, si për shembull më 16 prill, ditën e lindjes së Jozef Racinger,
që mbushi 86 vjeç. Në meshën e asaj dite, në kapelën e Shtëpisë së Shën Martës, Papa
Françesku u lut për Benediktin XVI, duke i kërkuar Hyjit të Gjithpushtetshëm t’i qëndrojë
pranë e ta ngushëllojë.