Mesha e 1 Majit. Papa: shoqëria, që nuk jep punë ose i shfrytëzon punëtorët, është
e padrejtë.
Shoqëria nuk është e drejtë, nëse nuk u jep të gjithëve punë, e aq më keq, nëse i
shfrytëzon punëtorët: këtë pohoi Papa gjatë Meshës, kryesuar në Kapelëzën e Shtëpisë
së Shën Martës, në Vatikan, me rastin e përkujtimit të Shën Jozefit Punëtor. Të pranishme
në Meshë, disa vajza-nëna, të strehuara në Qendrën e solidaritetit “Ura”, themeluar
në Civitavekia, në vitin 1979. Shoqëroheshin nga drejtori i shoqatës, don Egjidio
Zmakia. Në Ungjillin e
ditës, Jezusi thirret ‘biri i zdrukthëtarit’. Jozefi ishte punëtor e Jezusi mësoi
të punonte si ai. Leximi i parë na kujton se Zoti punon për të krijuar botën. Kjo
ikonë e Hyjit punëtor, pohoi Papa, na bën të mendojmë se puna është diçka më shumë
se përpjekje për të fituar bukën e gojës: “Puna na jep dinjitet! Kush punon,
është njeri i denjë, ka dinjitet të posaçëm, dinjitetin e njeriut: burri e gruaja,
që punojnë, janë të denjë. Ndërsa ata, që nuk punojnë, nuk e kanë këtë dinjitet. Por
sa shumë janë ata, që duan të punojnë e nuk munden! E kjo është një barrë e rëndë
për ndërgjegjen tonë, sepse kur shoqëria organizohet në një mënyrë të tillë, që nuk
u siguron punë të gjithëve, u mohon dinjitetin e punës, kjo shoqëri nuk është e mbarë;
nuk është e drejtë! Shkon kundër vetë Zotit, i cili deshi që dinjiteti ynë të niste
pikërisht prej këtu, prej punës”. Dinjitetin, vijoi Papa, nuk na e jep
pushteti, paraja, kultura, jo! Dinjitetin na e jep puna! E një punë e denjë, duke
pasur parasysh se sot shumë sisteme shoqërore, politike, ekonomike zgjedhin rrugën
e shfrytëzimit të njeriut: “Të mos e paguash të drejtin, të mos i
japësh njeriut punë, vetëm pse shikon buxhetet, buxhetet e ndërmarrjes; vetëm pse
bën llogari sa mund të fitosh. Kjo shkon kundër Zotit. Sa herë, sa herë, e kemi lexuar
këtë në ‘L’Osservatore Romano!’. Një titull, që më preku thellë, ishte ai i tragjedisë
së Bangladeshit. ‘Të jetosh me 38 euro në muaj! Kaq paguheshin këta njerëz, që vdiqën.
Kjo quhet ‘punë skllavi’. E sot në botë ekziston kjo skllavëri, e cila shfrytëzon
aftësinë më të bukur, që i dha Zoti njeriut: aftësinë për të krijuar, për të punuar,
për të realizuar dinjitetin vetjak. Sa vëllezër e motra në botë janë në një gjendje
të tillë, për faj të këtyre rrethanave ekonomike, politike e kështu me radhë...”. Papa
citoi, më pas, një rabin të mesjetës, që i rrëfente bashkësisë së tij hebraike historinë
e Kullës së Babelit: asokohe tullat ishin tejet të kushtueshme: “Kur
ndonjë tullë, gabimisht, binte, ishte problem i tmerrshëm, shkandull: “Pa shiko ç’hata
na bëre”. Por në se ndonjë prej atyre, që bënin Kullën, rrëzohej, mjaftoheshin me
një “Pushoftë në paqe!”, ose e linin në punë të vet. Kishte më shumë rëndësi një
tullë, sesa një njeri. Këtë tregonte rabini mesjetar, e pikërisht kjo ndodh tani!
Njerëzit kanë shumë më pak rëndësi, sesa gjërat, të cilat u sigurojnë fitime atyre,
që kanë pushtet politik, shoqëror, ekonomik. Shiko në ç’pikë kemi arritur! Në atë
pikë, sa të humbasim vetëdijen mbi dinjitetin e njeriut; dinjitetin e punës. Po sot
figura e Shën Jozefit, e Jezusit, e Hyjit, që punojnë, e ky është modeli ynë, na tregojnë
rrugën për të shkuar drejt dinjitetit”. Sot, vërejti më tej Papa, nuk mund
ta themi më atë, që thoshte Shën Pali: “Kush nuk do të punojë, nuk duhet as të hajë”,
po duhet të themi: “Kush nuk punon, e ka humbur dinjitetin”, sepse nuk ka mundësi
të punojë. Madje duhet shtuar edhe se shoqëria e zhveshi këtë njeri nga dinjiteti
i tij. Sot, shtoi Papa, bëjmë mirë ta dëgjojmë përsëri zërin e Zotit, në çastin kur
i drejtohet Kainit, duke i thënë: “Kain, ku është yt vëlla?’. Sot e dëgjojmë zërin
e Zotit, që na thotë: “Ku është yt vëlla, që nuk ka punë? Ku e ke vëllain tënd, që
është nën zgjedhën e një pune të denjë për skllevërit?”. Papa përfundoi me një ftesë
për t’u lutur: “Të lutemi për të gjithë vëllezërit e motrat, që vuajnë nën
zgjedhën e mungesës së punës ose të shfrytëzimit në punë. E ashtu qoftë!".