Papa pret Shimon Peres: paqe në Tokën Shenjte e në Siri. Papa Françesku ftohet në
Izrael.
Sot, në Pallatin Apostolik të Vatikanit, Ati i Shenjtë Françesku priti në audiencë
Shkëlqesinë e Tij, Zotin Shimon Perez, President i Shtetit të Izraelit, i cili më
pas u takua edhe me sekretarin e Shtetit të Shenjtërisë së Tij, kardinalin Tarçizio
Bertone, shoqëruar nga sekretari për Marrëdhëniet me Shtetet, imzot Dominik Mambertì.
Gjatë bisedimeve të përzemërta, njofton një notë e Sallës së Shtypit të Vatikanit,
u fol për situatën politike e shoqërore në Lindjen e Mesme, ku vijojnë jo pak konflikte.
U urua të rifillojnë sa më shpejt bisedimet ndërmjet izraelitëve e palestinezëve në
mënyrë që, me vendime guximtare e gatishmëri nga të dyja palët, si edhe me ndihmën
e Bashkësisë Ndërkombëtare, të mund të arrihet një marrëveshje, që respekton dëshirat
e ligjshme të të dy popujve e kështu të kontribuojë për paqen e stabilitetin në të
gjithë Rajonin. U kujtua edhe Qyteti i Jeruzalemit. E u shpreh shqetësimi për konfliktin,
që po e trondit gjithnjë më thellë jetën e Sirisë e të sirianëve, me urimin për arritjen
e një rrugëzgjidhjeje politike, mbi bazën e logjikës së pajtimit e të dialogut. U
diskutua edhe për disa çështje, që kanë të bëjnë me marrëdhëniet ndërmjet Kishës dhe
Shtetit të Izraelit si dhe Selisë së Shenjtë, Autoriteteve shtetërore e bashkësive
katolike vendase.U vlerësuan hapat para, që janë bërë nga Komisioni dypalësh i punës,
i impenjuar në hartimin e Marrëveshjes mbi çështje me interes të përbashkët, me urimin
që të përfundojë sa më shpejt.