Հայապահպանման Աշխատանքները Եւ Աշակերտութեան Դերը» Նիւթով Միօրեայ Սեմինար
Կազմակերպութեամբ Հայ կաթողիկէ Մեսրոպեան բարձրագոյն վարժարանի աշակերտական խորհուրդի
տեղեկատուական-ուսումնասիրական խմբակին, երէկ` կիրակի, 28 ապրիլին, առաւօտեան տեղի ունեցաւ
«Լիբանանահայ գաղութը, հայապահպանման աշխատանքները եւ աշակերտութեան դերը» նիւթով միջդպրոցական
միօրեայ Գ. սեմինարը` մասնակցութեամբ լիբանանահայ 10 վարժարաններու միջնակարգ դասարաններէն
երեքական ներկայացուցիչներու: Միօրեայ սեմինարը սկսաւ Լիբանանի եւ Հայաստանի քայլերգներով,
ապա կազմակերպիչ խմբակին անունով խօսք առաւ Վանեսսա Նաժժար, որ նշեց, թէ հայապահպանման
աշխատանքներուն մէջ լիբանանահայ աշակերտը ունի մեծ պարտականութիւն` լաւապէս ճանչնալ իր
պատմութիւնը եւ լեզուն, պահպանել մշակոյթը, արժէքներն ու ժառանգութիւնները եւ տէր կանգնիլ
հայութեան դատին: Նաժժար շնորհակալութիւն յայտնեց մասնակից վարժարաններու տնօրէններուն
եւ ուսուցիչներուն, որոնք նեցուկ կանգնեցան այս նախաձեռնութեան յաջողութեան: Ապա խօսք
առաւ Մեսրոպեան վարժարանի տնօրէն Կրեկուար Գալուստ, որ նշեց, թէ այս նախաձեռնութիւնը
իր բնոյթով եզակի է, որ կ՛անդրադառնայ լիբանանահայութիւնը մտահոգող ամէնէն էական խնդիրին`
հայապահպանումին, որ կ՛իրականանայ բծախնդիր, կազմակերպուած եւ միացեալ ճիգերով: Գալուստ
յոյս յայտնեց, որ սեմինարին մասնակից աշակերտներուն լուրջ, ազգային եւ միասնակամ մթնոլորտը
օրինակելի դառնայ բոլորին: Բարի գալուստի խօսքերէն ետք, աշակերտները պատասխանեցին
հայապահպանման հարցերուն մասին հարցախոյզի մը հարցումներուն, որմէ ետք դիտեցին լիբանանահայութեան
պատմութեան մասին տեսերիզ մը: Սեմինարի առաջին զեկուցաբերն էր Յակոբ Հաւաթեան, որ
ներկայացուց «Հայապահպանման նպատակը, միջոցները եւ դժուարութիւնները» նիւթը: Երկրորդ
նիւթն էր «Լիբանանահայ գաղութին իրավիճակը անցեալէն այսօր»: Զեկուցաբերն էր դոկտ. Անդրանիկ
Տագէսեան: Ճաշի դադարէն ետք խօսք առաւ միօրեայ սեմինարի երրորդ զեկուցաբերը` Հայ կաթողիկէ
վարժարաններու տնօրէններու խորհուրդի նախագահ հայր Գէորգ Ծ. վրդ. Եղիայեան: Զեկուցումը
կը կրէր «Լիբանանահայ աշակերտին ազգային եւ հոգեւոր պատկանելիութիւնը» նիւթը: Զեկուցումներէն
ետք աշակերտները ներկայացուցին իրենց հարցումները եւ յայտնեցին տեսակէտները: Միօրեայ
հանդիպումին վերջին նիւթը նուիրուած էր հայապահպանման աշխատանքին մէջ աշակերտութեան դերակատարութեան:
Զրոյցը վարեց Մարօ Շորճեան: Զրոյցին յաջորդեց խմբային աշխատանք մը, որուն ընթացքին աշակերտները
խումբերու ընդմէջէն բնորոշեցին հայ աշակերտին պարտականութիւնները հայապահպանման աշխատանքներուն
մէջ եւ պատրաստեցին նշանակներ: Աւարտին, Սերուժ Եթերեան ներկայացուց հարցախոյզին արդիւնքները:
Ապա ան կարդաց սեմինարի մասնակիցներուն անունով հրապարակուելիք միացեալ յայտարարութիւնը,
որ ընդունուեցաւ բոլոր մասնակիցներուն կողմէ