Diskutohet implementimi i marrëveshjes mes Kosovës e Serbisë
Ministri i Punëve të Brendshme të Kosovës, Bajram Rexhepi priti në takim një delegacion
të kryesuar nga Andreas Kindl, korrespondent evropian për Politikë dhe Koordinim të
Politikës dhe Sigurisë se Jashtme të BE-së dhe në Ministrinë e Punëve të Jashtme të
Republikës Federale të Gjermanisë. Gjatë takimit u diskutua lidhur me planin e implementimit
të marrëveshjes për normalizimin e marrëdhënieve mes Republikës së Kosovës dhe Serbisë.
Me këtë rast, Kindl e përgëzoi Qeverinë e Kosovës për nënshkrimin e marrëveshjes
dhe theksoi se tashmë është e rëndësishme që palët t’i përmbahen planit të përmbushjes
së marrëveshjes dhe për këtë do të keni edhe përkrahjen e shtetit gjerman. Ndërsa,
ministri Bajram Rexhepi e njoftoi për angazhimet e Ministrisë së Punëve të Brendshme
për përmbushjen e kritereve që dalin nga udhërrëfyesi për liberalizim të vizave Ministri
kosovar Rexhepi falënderoi shtetin gjerman për përkrahjen e vazhdueshme dhe qëndrimin
konsistent të shtetit gjerman për përkrahje të vendeve të Ballkanit. Kryeministri
i Serbisë, Ivica Daçiq ka deklaruar sot se në muajin maj në Bruksel do të mbahet takim
i ri me përfaqësuesit e Prishtinës. “Sipas njoftimeve që vijnë nga (përfaqësuesja
e lartë e BE-së,Ketrin eshton ( Catherine) Ashton), në muajin maj na presin takime
të reja”, ka thënë Daçiq para gazetarëve në Beograd. Daçiq ka thënë se ai bashkë
me nënpresidentin e Qeverisë, Aleksandër Vuçiq, nesër do të takohet edhe njëherë me
përfaqësuesit e serbëve të Kosovës, duke shtuar se nga takimi i fundit nuk ka ndryshuar
asgjë dhe se referendumi mbi marrëveshjen për normalizimin e raporteve mes Beogradit
dhe Prishtinës do të zhvillohet, në afatin më të shkurtër të mundshëm. Ai ka thënë
se Serbia nuk mund të presë me muaj për zbatimin e marrëveshjes. Kosova dhe Serbia
arritën marrëveshje për normalizimin e raporteve më 19 prill në Bruksel, por, ende
nuk ka nisur zbatimi i saj.