Lutja e Mbretëreshës Qiellore: Papa Françesku kërkon dinjitet e siguri për të gjithë
punëtorët.
“Të gjithë jemi të thirrur për ta pranuar të renë e Hyjit në jetën tonë”. Kështu u
shpreh Papa Françesku para lutjes së Mbretëreshës Qiellore, duke përshëndetur besimtarët
e mbledhur në Sheshin e Shën Pjetrit, përplot me të rinj, ardhur nga të katër anët
e botës për të ndjekur Meshën, kryesuar nga Ati i Shenjtë, në Ditën e sotme kushtuar
të rinjve, në pritje të Krezmimit si dhe të krezmuarve.Papa Françesku, duke u shprehur
solidaritetin dhe dhimbjen familjarëve të më se 300 punëtorëve tekstilistë, që humbën
jetën në aksidentin tragjik të së mërkurës së kaluar në Dhaka të Bangladeshit, kërkoi
dinjitet e siguri për të gjithë punëtorët e botës: “Në këtë çast të veçantë,
dëshiroj të lartoj një lutje për viktimat e shumta, shkaktuar nga shembja tragjike
e një fabrike në Bangladesh. U shpreh solidaritetin e afërsinë time të ndjerë familjeve,
që qajnë të dashurit e bëj, nga thellësia e zemrës, një thirrje të fortë, që të mbrohet
gjithnjë e kudo dinjiteti e siguria e punëtorit”. Më pas, duke dialoguar
simbolikisht me gjithë të pranishmit në Sheshin e Shën Pjetrit, në një atmosferë gëzimi
e hareje, Papa kujtoi se Virgjëra Mari na mëson ç’do të thotë të jetosh në Shpirtin
Shenjt e edhe ç’do të thotë ta pranosh të renë e Zotit në jetë. Prandaj Papa Françesku
ia besoi të sapokrezmuarit Zojës së Bekuar: “... secili i krishterë e secili
nga ne, është i thirrur ta pranojë Fjalën e Zotit, ta pranojë Jezusin në shpirtin
e vet, për t’ua çuar, pastaj, të gjithëve”. E nëse Maria, vërejti Papa,
iu lut Shpirtit Shenjt së bashku me Apostujt, në çenakull, edhe ne, sa herë që mblidhemi
për t’u lutur, mbështetemi nga prania shpirtërore e Nënës së Krishtit, për të marrë
dhuratën e Shpirtit Shenjt e për të pasur forcë ta dëshmojmë Krishtin e ngjallur: “Këtë
jua them në mënyrë të veçantë ju, që morët sot Krezmimin: Maria ju ndihmoftë të jeni
të vëmendshëm, për ta kuptuar atë, që ju kërkon Zoti; për të jetuar e për të ecur
gjithnjë sipas Shpirtit Shenjt”.