Իրան «5+1»-ի Հետ Բանակցութիւնները Վերսկսելու Պատրաստակամութիւն Կը Յայտնէ
«Առ.Պի.Սի.ռու» կայքէջը կը գրէ, որ Իրան պատրաստակամութիւն յայտնած է իր հիւլէական ծրագիրին
շուրջ «5+1»-ի հետ բանակցութիւնները շարունակելու եւ աւելցուցած, որ բանակցութիւններու
թուականի վայրին եւ ժամանակին մասին Եւրոպական Միութեան առաջարկներուն կը սպասէ: Իրանեան
պատուիրակութեան փոխղեկավար Ալի Պակերի երէկ յայտարարած է, որ երբ Եւրոպական Միութիւնը
իրանեան կողմը տեղեակ պահէ յարակից մանրամասնութիւններուն մասին, բանակցութիւնները կրնան
սկսիլ: Ան «Ռոյթըրզ»-ի հետ հարցազրոյցի մը ընթացքին նշած է, որ Իրանի ազգային անվտանգութեան
բարձրագոյն խորհուրդի քարտուղար Սայիտ Ճալիլի եւրոպական դիւանագիտութեան ղեկավար Քեթրին
Էշթընէն հեռաձայնային հաղորդակցութեան կը սպասէ: Պակերի անգամ մը եւս հաւաստիացուցած
է, որ Իրանի հիւլէական ծրագիրը բացառապէս խաղաղ բնոյթ կը կրէ: Նշենք, որ Ալմաթիի մէջ
«5+1»-ի եւ Իրանի միջեւ բանակցութիւններու նախորդ փուլը արդիւնքի չէր հասած. կողմերը
չէին կրցած համաձայնութիւն գոյացնել: