Беларусь: падрыхтоўка да ўрачыстасцяў у Будславе выйшла на фінішную прамую
Да ўрачыстасцяў у
Будславе застаецца два месяцы. Яны пройдуць сёлета 5-6 ліпеня. У гэтым годзе спаўняецца
роўна 400 гадоў з моманту прыбыцця цудатворнага абраза Маці Божай на беларускую зямлю.
Маштабнаму юбілею папярэднічала і сур’ёзная падрыхтоўка, амаль трохгадовая, у ёй прыняла
ўдзел уся каталіцкая супольнасць краіны. І не толькі – свята выйшла на дзяржаўны ўзровень,
у тым ліку па падрыхтоўцы самога санктурарыя, паведаміў ксёндз Юрый Санько, адказны
за СМІ пры Канферэнцыі Каталіцкіх Біскупаў у Беларусі. “Дзяржава выдаткавала некаторыя
сродкі на рэстаўрацыю касцёла, і ўжо закончаны знешнія працы, фасады адрэстаўраваныя.
Таксама па ініцыятыве дзяржаўных уладаў будзе арганізаваны моладзевы лагер па ўпарадкаванні
мястэчка Будслаў. Гэта кажа аб тым, што дзяржава адкрываецца на такія вялікія ўрачыстасці”,
- паведаміў святар.
Нацыянальны банк Беларусі выпусціць спецыяльную юбілейную
манету з выявай абраза Маці Божай Будслаўскай, Белпошта – марку, канверт і паштоўкі.
Магчыма, іх і атрымае нехта з запрашэннем на свята. А гасцей у гэтым годзе чакаюць
шмат, улічваючы, што ў неюбілейныя гады ў невялікім мястэчку збіраецца ад 30 ды 50
тысяч пілігрымаў. Як заўсёды, шмат з іх прыдуць у Будслаў пешшу. Пажарожжа з Далгінава
ў Будслаў, другі раз у сваёй гісторыі, зробіць і абраз, адзначыў кс. Юрый. “Абраз
падчас пілігрымкі будзе прынесены з Далгінава, як і 400 год таму. Яго пранясуць пілігрымы,
таму што менавіта з Далгінава прыбыла святыня і засталася назаўсёды ў Будславе”, -
адзначыў ён.
Шмат малітваў, Крыжовы Шлях, працэсія са свечкамі – усё гэта
чакае пілігрымаў на ўрачыстасці. І не толькі цудатворнаму абразу змогуць пакланіцца
вернікі. Упершыню падчас свята ў Будслаў будуць прынесены рэліквіі св. Тэрэзы ад Дзіцятка
Езус, якія ў гэты час будуць знаходзіцца ў Беларусі. На свята прыедуць шматлікія госці
– прадстаўнікі еўрапейскіх епіскапатаў. А таксама – папскі пасланнік. Святы Айцец
прызначыў кардынала Жана-Луі Тарана, старшыню Папскай рады па міжрэлігійным дыялогу,
сваім спецыяльным легатам на будслаўскія ўрачыстасці. Менавіта ён і абвясціў пра абранне
папы Францішка ў сакавіку. “Гэта вельмі важна, гэта паказвае не толькі статус урачыстасці,
але і значнасць свята на ўзроўні Паўсюднага Касцёла. Гэта дэманструе тое, што Папа
таксама хоча выказаць сваю прысутнасць сярод нас”, - адзначыў адказны за СМІ.
Кардынал
Жан-Луі Таран узначаліць галоўную св. Імшу 6 ліпеня. Пакуль жа абраз Маці Божай Будслаўскай
працягвае перэгрынацыю па краіне, каб аб’яднаць вакол сябе як мага больш вернікаў.