Papa: feja nuk është tjetërsim, por udhë e së vërtetës, që na përgatit të shikojmë
fytyrën e mrekullueshme të Zotit.
Udha e fesë nuk është udhë tjetërsimi. Është përgatitje e zemrës për të parë fytyrën
e mrekullueshme të Zotit: këtë pohoi sot Papa gjatë homelisë së Meshës, kryesuar në
Domus Sanctae Marthae. Në kremtim morën pjesë disa punonjës të Tipografisë së Vatikanit,
të Xhandarmërisë e të Zyrës së Punës të Selisë Apostolike (Ulsa). Në Ungjillin
e ditës lexohen fjalët e Jezusit drejtuar dishepujve: “Mos t’ju trazohet zemra”:“Këto
fjalë të Jezusit janë vërtet të bukura. Në çastin kur po ndahej prej tyre, Jezusi
u flet dishepujve të tij, e fjalët i dalin nga thellësia e zemrës. Ai e di se dishepujt
janë të trishtuar, nga që e shikojnë se punët nuk shkojnë mirë. E u thotë: ‘Mos të
trazohet zemra juaj’. E nis t’u flasë kështu, si mik, e edhe si bari, siç bën bariu
me delet e veta, apo jo? ‘Mos t’ju shqetësohet zemra. Kini besim në Hyjin, e edhe
në mua’. E nis të flasë, për çfarë? Për qiellin, atdheun përfundimtar. ‘Kini besim
edhe në mua: unë mbetem besnik’: është si të thoshte këtë, apo jo? Me pamjen e inxhinierit,
të arkitektit, u tregon atyre atë, që po shkon të bëjë: ‘Po shkoj t’ju përgatis një
vend. Në shtëpinë e Atit tim ka shumë banesa’. E Jezusi shkon t’u përgatisë një vend”. Papa
pyeti: “E si është ky vend? Ç’do të thotë të përgatisësh një vend? Të përgatisësh
një vend do të thotë të përgatisësh mundësinë për t’u kënaqur, mundësinë tonë për
të parë, për të dëgjuar, për të kuptuar bukurinë e së pritmes, të atdheut, kah i cili
shkojmë”: “E gjithë jeta e krishterë është punë e Jezusit, e Shpirtit Shenjt
për të përgatitur një vend, për të përgatitur sy, që mund të shikojnë... ‘Por, o Atë,
unë shikoj fare mirë! Nuk kam nevojë për syze!’. S’është fjala për syze! Kjo është
një mënyrë tjetër për të parë, një shikim tjetër... Të mendojmë ata, që janë të sëmurë
nga katarakti, që kanë perde në sy: ata shohin, por pas operacionit, çfarë thonë?
S’e kisha menduar kurrë se do të mund të shikoja përsëri kështu, pa syze, mrekullisht
mirë!’. Sytë tanë, sytë e shpirtit tonë kanë nevojë të përgatiten për ta parë fytyrën
e mrekullueshme të Jezusit. Të përgatiten edhe veshët, për të dëgjuar gjëra të bukura,
fjalë të bukura. E, në radhë të parë, duhet përgatitur zemra: të përgatitet për të
dashur, për të dashur gjithnjë më shumë”. Në udhën e jetës, nënvizoi Papa,
Zoti e përgatit zemrën tonë herë me prova e herë me ngushëllime; herë me turbullime
e herë me gjëra të mira: “E gjithë udha e jetës, është udhë përgatitjeje.
Disa herë Zoti duhet ta bëjë këtë ngutshëm, siç e bëri me hajdutin e mirë: kishte
vetëm pak minuta për ta përgatitur, e i mjaftuan. Por në jetën normale duhet të përgatitesh
ngadalë. Të përgatisësh zemrën, sytë, veshët, për të arritur në atdhe. Sepse ky është
atdheu ynë. ‘Por, o Atë, unë shkova tek një filozof e më tha se këto mendime janë
tjetërsim, se ne jemi të tjetërsuar, se jeta është kjo që është e përtej saj nuk e
dimë ç’na pret!’. Disa mendojnë kështu. Por Jezusi na thotë se nuk është kështu e
na thotë edhe ‘Kini besim në mua. Kjo që po ju them, është e vërteta : unë nuk ju
mashtroj, nuk ju gënjej”. Të përgatitesh për qiell, vijoi Papa, do të thotë
ta përshëndesësh çdo ditë nga pak, prej së largu. E ky nuk është tjetërsim: është
vetë e vërteta, është ta lësh Jezusin ta përgatisë zemrën tonë, sytë tanë, për këtë
bukuri tejet të madhe. Është udha drejt bukurisë, udha e kthimit në atdhe. Së fundi
Papa u lut që Zoti të na e japë këtë shpresë kaq të fortë, këtë guxim e edhe këtë
përvujtëri, që ta lëmë ta përgatisë banesën, banesën përfundimtare, në zemrën tonë,
në sytë tanë e në veshët tanë. Ashtu qoftë!