Францішак: вялікая душа не палохаецца вялікіх рэчаў
Прапаведванне Евангелля
павінна грунтавацца на пакоры, служэнні і братэрскай любові. На гэта звярнуў увагу
папа Францішак 25 красавіка падчас ранішняй св. Імшы ў Доме св. Марты. “Хрысціянін
прапаведуе Евангелле сваім сведчаннем, больш чым словамі”, - падкрэсліў Святы Айцец.
Паводле яго, паслядоўнікі Хрыста павінны быць велікадушнымі, бо менавіта ў гэтым заключаецца
хрысціянскае пакліканне. “Заўсёды больш, заўсёды наперад”, - заклікаў Пантыфік. Папа
адзначыў, што “вялікая душа не палохаецца вялікіх рэчаў, не баіцца ісці насустрач
неабсяжнаму гарызонту, не баіцца быць пакорным у малых рэчах”. Ён падкрэсліў, што
менавіта на гэтым грунтуецца “місіянерства Касцёла”. “Калі мы ідзём з гэтымі велікадушнасцю
і пакорай, калі не палохаемся вялікіх рэчаў, гэтага гарызонту, але прымаем таксама
малыя рэчы – сціпласць, штодзённую любоў – Пан умацоўвае наша слова. І мы рухаемся
наперад”, - сказаў Святы Айцец. Ён нагадаў, што “трыумф Касцёла – ва ўваскрасенні
Езуса”, але “перад гэтым быў крыж”. “Папросім сёння Пана, каб мы станавіліся місіянерамі
Касцёла, апосталамі Касцёла з гэтым духам: вялікадушнасцю і вялікай пакорай”, - запрасіў
прысутных на Эўхарыстыі Пантыфік. У ёй прынялі ўдзел члены Сакратарыяту Сінода Біскупаў
на чале з Генеральным сакратаром, арцыбіскупам Ніколам Этэравічам, а таксама супрацоўнікі
Ватыканскай жандармерыі.