Ватыканскі іерарх прапануе праект рэформы Рымскай курыі
Кардынал Франчэска
Кокапальмерыё, вядомы спецыяліст па Кананічным праве і старшыня Папскай рады па інтэрпрэтацыі
заканадаўчых тэкстаў, у інтэрв’ю “La Croix”, падзяліўся некаторымі аспектамі распрацаванага
ім праекту рэформы Рымскай курыі, больш арганізаванай і паслядоўнай. Іерарх лічыць,
што гэта можна асягнуць за кошт большай калегіяльнасці ў яе дзейнасці. Ён прапануе
ўвесці пасаду “мадэратара Рымскай курыі”, свайго роду “генеральнага дырэктара”, які
пераняў бы ад Дзяржсакратара знешнюю камунікацыю, у накірунку Паўсюднага Касцёла.
Паўнамоцтвы “мадэратара” абмяжоўваліся б, паводле кардынала Кокапальмерыё, толькі
да Рымскай курыі.
Паводле праекту, кардыналы - кіраўнікі дыкастэрый, павінны
“на прамую і часта, прынамсі раз у месяц” мець магчымасць сустрэчы з Папам, каб інфармаваць
Пантыфіка непасрэдна аб сваёй дзейнасці. Акрамя таго, яны павінны рэгулярна сустракацца
паміж сабой, у прысутнасці Папы, з мэтай каардынацыі сваёй дзейнасці.
Пасля
стварэння кансультацыйнай групы пры Пантыфіку з васьмі кардыналаў, якія прадстаўляюць
пяць кантынентаў, што сведчыць аб жаданні Папы мець непасрэдны кантакт з епіскапатамі
ўсяго свету, паводле кардынала Кокапальмерыё, існуе неабходнасць у стварэнні кансіліума
з двух-трох кардыналаў, сапраўдных “рымскіх”, як назваў іх старшыня Папскай рады па
інтэрпрэтацыі заканадаўчых тэкстаў, якія дапамагалі б Святому Айцу ў штодзённым кіраванні
Касцёлам.
Кардынал нагадаў, што апошняя рэформа Рымскай курыі адбылася ў 1967
г. падчас пантыфікату папы Паўла VI. Некаторыя змены ў яе функцыянаванне былі ўнесены
ў часы Яна Паўла ІІ.
Рэформа Курыі запатрабуе таксама ўдзелу экспертаў, асабліва
ў эканамічнай сферы. Гаворка ідзе пра новае “разгрупіраванне” Прэфектуры эканамічных
спраў і Адміністрацыі маёмасці Апостальскай Сталіцы, а таксама вызначэнне новых кампетэнцый
Губернатарата Дзяржавы Ватыкан. Таксама можа паўстаць пытанне Ватыканскага банка і
эканамічных і фінансавых аспектаў дзейнасці некаторых кангрэгацый. Можа быць “гарманізавана”
тэматыка дзейнасці некаторых ватыканскіх дыкастэрый.