«Քաղաքական Լուծումը Սուրիական Տագնապի Լաւագոյն Լուծումն Է» Կ՛ըսէ Լաւրով
Ռուսիոյ արտաքին գործոց նախարար Սերկէյ Լաւրով Պրիւքսէլի մէջ ՕԹԱՆ-ի արտաքին գործոց նախարարներու
ժողովէն ետք յայտարարեց, որ ժողովին ընթացքին այլ հարցերու կողքին քննարկուած է նաեւ
Սուրիոյ հարցը: Ան շեշտեց, որ «քաղաքական երկխօսութիւնը այսպիսի տագնապներու, մասնաւորաբար
սուրիական տագնապին լաւագոյն լուծումն է»: «Սուրիական տագնապը, որ օրէ օր մագլցում
կ՛արձանագրէ, սպառնալիք մըն է, զոր բոլորս պիտի դիմակայենք, եթէ այս վիճակին մէջ մնայ»,
ըսաւ ան` աւելցնելով, որ «Սուրիոյ մէջ կռուող ընդդիմադիր խմբաւորումներու զինումը կը
մերժենք»` նշելով, որ «Սուրիական ազատ բանակը Ժապհաթ Նուսրայէն աջակցութիւն կը ստանայ»: ՕԹԱՆ-ի
ընդհանուր քարտուղար Անտերս ֆոկ Ռասմուսեն յայտնեց, որ հակառակ կացութեան վատթարացման,
ՕԹԱՆ Սուրիոյ մէջ միջամտելու մտադրութիւն չունի: Իսրայէլեան «Հաարեց» օրաթերթը հաղորդեց,
որ իսրայէլեան բանակի գաղտնի սպասարկութեան աւագ վերլուծաբաններէն զօր. Իթայ Պարոն յայտնած
է, որ Սուրիոյ կառավարական ուժերը քիմիական զէնքեր օգտագործած են: Ան Թել Աւիւի մէջ ապահովական
հարցերու շուրջ խորհրդաժողովի մը ընթացքին յայտնեց, որ վարչակարգի շարք մը պարագաներու
օգտագործած նիւթը հաւանաբար «Սարին» կազն էր: ՄԱԿ-ի ընդհանուր քարտուղար Պան Քի Մուն
Արաբական լիկայի ընդհանուր քարտուղար Նեպիլ Արապիի եւ Քաթարի վարչապետ Ժասեմ պըն Ժապըր
Ալ Թանիի հետ ունեցած հանդիպումին ընթացքին կոչ ուղղեց դէպի Սուրիա զէնքի արտածումը դադրեցնելու: Սուրիոյ
արտաքին գործոց նախարարը սուրիական ընդդիմութենէն քարիւղ ներածելու որոշումը թշնամական
արարք նկատեց: Մինչ այդ, Սուրիոյ ընդդիմադիր Ազգային համաձայնական մարմինը Սուրիոյ
ազգային խորհուրդի նախագահ Ժորժ Սապրան ժամանակաւորապէս ընտրեց իբրեւ իր նախագահը` փոխարինելու
համար Ահմետ Մաազ Խաթիպը, որ կիրակի օր հրաժարած էր: