Viti i Fesë: u paraqitën takimet e të krezmuarve dhe të Vëllazërive me Papën
Dy ngjarje, që do të zgjasin katër ditë: janë takimet e ardhshme në kuadrin e Vitit
të Fesë, që u paraqitën sot në Sallën e Shtypit të Vatikanit nga kryetari i Këshillit
Papnor për Ungjillëzimin e Ri, imzot Rino Fizikela. Është fjala për Ditën e të Krezmuarve
dhe të atyre që do të krezmohen, si edhe për Ditën e Vëllazërive dhe të Fesë popullore:
e para, kremtohet më 27 e 28 prill dhe, e dyta, nga 3 më 5 maj. Janë të gjitha
veprimtari të miratuara nga Benedikti XVI e të konfirmuara nga Papa Françesku. Për
Ditën e të Krezmuarve, të dielën e ardhshme, në meshën me Atin e Shenjtë, janë regjistruar
tashmë 70 mijë vetë, por parashikohen shumë më tepër. Papa Françesku do t’u japë Sakramentin
e Krezmimit 44 besimtarëve nga kontinente të ndryshme, të cilët mund të bëhen 46,
nëse do të arrijnë të vijnë dy vetë nga Haiti. Shumica e tyre janë të rinj, por ka
edhe një person nga Kapoverde, 55 vjeç. Pastaj, një i ri i gjymtuar e një person nga
një zonë e dëmtuar prej tërmetit, dëshmojnë universalitetin e Kishës: “Do të
kemi të rinj, që vijnë nga zona, ku të krishterët jetojnë në gjendje të vështirë,
ku popullsitë janë akoma nën kudhrën e luftës, ose të fatkeqësive natyrore. Gjithsesi,
janë të rinj, që dëshmojnë fytyrën e Kishës, aty ku njeriu jeton e vuan”. Ngjarja
e dytë, siç shpjegoi imzot Fizikela, do të zhvillohet më 3 e 5 maj dhe i kushtohet
Vëllazërive të krishtera: “Do të japin dëshminë e traditave të tyre të ndryshme
lokale, fryt i një feje, që është shprehur në shekuj me nisma e vepra arti, të cilat
i kanë rezistuar kohës, deri në ditët tona”. Në program, 55 mijë vetë, që
do të shpërndahen në mëse 20 kisha të Romës. Të dielën, më 5 maj, do të marrin pjesë,
me veshjet e tyre tradicionale, në meshën e kryesuar nga Papa Françesku në Bazilikën
e Shën Pjetrit, e do të marrin me vete edhe disa vepra arti, që do të ekspozohen gjatë
kremtimit. Imzot Fizikela kujtoi dy pika të rëndësishme, që kanë të bëjnë me
Vitin e Fesë: “Një ditë para secilës prej ngjarjeve, pjesëmarrësve u propozohet
një procesion i shkurtër simbolik që fillon nga obelisku i Sheshit të Shën Pjetrit,
për të kaluar pranë Varrit të Apostullit, ku thuhet ‘Besojma’ – Professio Fidei. Gjatë
rrugës, do të shtjellohet një katekizëm i shkurtër për të kujtuar domethënien e vendeve
ku kalon procesioni dhe vlerën historike e fetare të tyre”. Kishat e ndryshme
janë gati të përballojnë shtimin e fluksit të rrëfimeve dhe impenjimin për katekizmin.
Përsa u përket rrëfimeve, të dëgjojmë sërish imzot Fizikelën: “Një nga synimet,
që e propozuam dhe e mbështetëm jashtëzakonisht, ishte pikërisht Rrëfimi, në mënyrë
që në çdo dioqezë, të krijohej një vend i caktuar e i njohur nga të gjithë, ku njerëzit
të mund të rrëfehen gjatë 24 orëve të ditës”. Gjithçka, rekomandon imzot Fizikela,
në frymën e shtegtimit, duke kujtuar se Viti i Fesë do të ketë edhe veprimtari të
tjera, si për shembull, adhurimi eukaristik i 2 qershorit, njëkohësisht, në çdo dioqezë
të botës, për organizimin e të cilit, po punon Këshilli Papnor për Ungjillëzimin e
Ri.