Lutja e Papës për lirimin e peshkopëve të rrëmbyer në Siri
“Rrëmbimi i dy mitropolitëve të Halebit, ai i Kishës siro-ortodokse, Mar Gregorios
Ibrahim dhe, ai i Kishës greko-ortodokse të Antiokisë, Paul Jazixhi, si edhe vrasja
e shoferit të tyre, ndërsa kryenin një mision humanitar, është konfirmim dramatik
i gjendjes tragjike, në të cilën jeton popullsia e Sirisë dhe bashkësitë e krishtera”:
kështu deklaroi sot, zëdhënësi i Selisë së Shenjtë, atë Federiko Lombardi. “Ati
i Shenjtë, Françesku – vazhdon drejtori i Sallës së Shtypit të Vatikanit – u informua
për këtë fakt të ri e të rëndë, që i shtohet dhunës së ditëve të fundit dhe emergjencës
humanitare me përmasa të jashtëzakonshme. Ai i ndjek ngjarjet me lutje e interesim
të thellë për shëndetin dhe lirimin e dy peshkopëve të rrëmbyer. Lutet gjithashtu,
që me impenjimin e të gjithëve, populli sirian të shohë më në fund zgjidhje të frytshme
për dramën humanitare, që po kalon, e në horizont, të vërejë lindjen e shpresave të
vërteta për paqe e pajtim”.