ֆրանչիսկոս Սրբազան Քահանայապետի Գործունէութիւնը։

Երկուշաբթի 22 ապրիլի առաւօտեան ժամը 11-ին, ֆրանչիսկոս Սրբազան Քահանայապետը ընդունեց Իտալիոյ Ումպրիա Մարզի եպիսկոպոսական համաւաւաք դասի անդամները որոնք հռոմ ժամանած են իրենց հնգամեայ կանոնական այցելութիւնը կատարելու Սուրբ Պետրոսի յաջորդին։ ֆրանչիսկոս Սրբազան Քահանայապետը ապա ժամը 12,15 անց ընդունեց Ավստրալիոյ Սիտնէյի Արքեպիսկոպոսը Կարտինալ Ժորժ Բել։

Յայտնենք որ Իտալիոյ Ումպրիա Եկեղեցւոյ մարզը ունի ութը թեմեր` Բերուճիա, Ասսիզի, Չիդդա Տի Գասթելլօ, ֆոլինիօ, Կուպիօ, Սփոլէթօ, Օրվիէթօ, Թերնի։ Մարզը ունի 8.456 քմ. քառակուսի տարածք եւ 888,482 բնակիչ։ Եպիսկոպսական համահաւաք դասի նախագահն է գերապայծառ Կուալթիէրօ Պասսէթթի։ Մարզը ունի 603 ժողովրդապետութիւններ ուր կը գործեն 988 քահանաներ եւ 115 սարկաւագներ։

Իսկ երէկ կիրակի 21 ապրիլի կէսօրին` Ողջ լեր Թագուհի մարեմեան աղօթքի ընթացքին, Սուրբ Պետրոսի հրապարակի վրայ համախմբուած 100 հազար հաւատացեալներու ներկայութեամբ, Սրբազան Քահանայապետը, Եկեղեցական կոչումներու աղօթքի օրուայ առթիւ,
հրաւիրեց երիտասարդները իրենց կեանքը նուիրելու ''բարձր իտէալներու'' համար։ Ունկնդրեցէք Աստուծոյ կոչը - ըսաւ Ան - ու հարց տուէք թէ Յիսուս ի՞նչ կ՛ուզէ ձեզմէ, եղէք քաջ''։ Ու երբ հրապարակը հաւաքուած ժողովուրդը սկսաւ բացագանչել ''ֆրանչիսկոս, ֆրանչիսկոս'' անունը Սրբազան Հայրը զանոնք հրաւիրեց ողջունելու նաեւ Յիսուսը ու անոնք միաբերան սկսան աղաղակել ''Յիսուս, Յիսուս''։