У многіх хрысціян
існуе спакуса знайсці іншую браму, каб увайсці ў Божае Валадарства, апроч Езуса, адзначыў
папа Францішак. Сваю гамілію ў капліцы Дома св. Марты 22 красавіка Пантыфік прысвяціў
вобразу Езуса – Добрага Пастыра, якога Евангелле называе “брамай для авечак”. “Адзіная
брама для ўваходу ў Божае Валадарства і Касцёл – гэта сам Езус”, - нагадаў Святы Айцец.
“Хто не ўваходзіць у аўчарню праз браму, залязаючы туды інакш, той злодзей і злачынец”,
які “жадае выключна ўласнай выгады”, - дадаў ён. У сённяшняй Эўхарыстыі на чале з
Папам прынялі ўдзел супрацоўнікі Залы Друку Апостальскай Сталіцы з яе кіраўніком кс.
Фэдэрыка Ламбардзі, а таксама тэхнічны персанал перадаючага цэнтра Ватыканскага радыё.
Францішак адзначыў, што у асяроддзі хрысціян існуюць тыя, хто свядома ці несвядома
робіць выгляд, што ўваходзіць у “аўчарню”, але на самой справе “крадзе хвалу Езуса,
хоча ўласнай славы”, на падабенства фарысеяў. Паводле Папы, каб увайсці ў браму, трэба
быць пакорным, бедным і справядлівым.
Езус не толькі брама, але і дарога, звярнуў
увагу Святы Айцец. Існуе шмат сцяжынак, “магчыма нават больш выгодных”, але яны памылковыя,
несапраўдныя, сказаў Папа. Пантыфік заклікаў прасіць Бога аб ласцы адшукання праўдзівай
брамы. “Часам яна бывае зачыненай і мы становімся смутнымі, апускаем рукі, нам цяжка
стукацца у яе. Але не ідзіце шукаць іншых, якія здаюцца больш простымі, камфортнымі,
блізкімі”, - заклікаў Папа і нагадаў, што Езус не падвядзе ніколі, бо сам аддаў жыццё
за кожнага з нас.