Ֆրանչիսկոս Սրբազան Քահանայապետի Գործունէութիւնը ։

Շաբաթ 20 ապրիլ 2013-ի առաւօտեան ժամը 11-ին ֆրանչիսկոս Սրբազան Քահանայապետը իր գրասենեակի մէջ ընդունեց` Կարտինալ Մարք Ուելլէն, Եպիսկոպոսներու Ժողովի կառավարիչը ու ապա ժամը 12-ին հանդիպում ունեցաւ գերապայծառ Վինչէնցօ Բալիայի հետ, Ընտանիքի Քահանայապետական խորհուրդի նախագահ։
Յայտնենք որ վաղը Կիրակի 21 ապրիլին, առաւօտեան ժամը 9,30-ին, ֆրանչիսկոս Սրբազան Քահանայապետը Եկեղեցական կոչումներու աղօթքի օրուան առթիւ, Սուրբ Պետրոսի Պազիլիքայի մէջ պիտի ձեռնադրէ Հռոմի Թեմի անդամ 10 նոր քահանաներ որոնցմէ չորսը կազմաւորում ստացած են Հռոմի Քահանայապետական աւագ նորընծայարանին մէջ, չորսը ''Րէտէմթորիս Մաթեր'' վարժարանին մէջ մինչ երկուքը ''Տիվինօ Ամորէ''ի նորընծայարանին մէջ։ Նորօծ քահանաներու շարքին են նաեւ 44 ամեայ իտալացի Ճուզեփփէ Գոնֆորդի եւ 40 ամեայ արժէնթինցի Ալպէրթօ Տանիէլ Լոբէզ Բանադանոն։ Նորօծ 10 քահանաներու մէջ կան նաեւ երկու հնդիկ սարկաւագներ։