Святы Пасад з прызнаннем глядзіць на цыркавое мастацтва
Ініцыятывай, якая
дазваляе пазнаць супольнасць, што адзначаецца высокімі сацыяльна-культурнымі і антрапалагічнымі
якасцямі, назваў IV Сусветны дзень цырка кардынал Антоніа Марыя Вэльё. У пасланні
на адрас Сусветнай федэрацыі цырка старшыня Папскай рады пастырства эмігрантаў і падарожнікаў
звярнуў увагу на значэнне гэтага Дня для нішчэння культурных і сацыяльных бар’ераў
паміж людзьмі і нясення паслання салідарнасці і братэрства. У гэтым працэсе, на думку
іерарха, цыркавое мастацтва з’яўляецца захавальнікам і сведкам.
Старшыня Папска
рады нагадаў словы Бэнэдыкта ХVІ да служачых цыркаў і лунапаркаў, сказаныя ў снежні
2012 г. Святы Айцец падкрэсліў, што менавіта праз свой стыль прадстаўнікі гэтай прафесіі
пакліканы сведчыць аб каштоўнасцях, якія для іх саміх з’яўляюцца традыцыйнымі: гэта
любоў да сям’і, клопат аб дзецях, увага да інвалідаў, дагляд за хворымі, павага да
пажылых і іх жыццёвага вопыту. Па словах Папы, гульні, прадстаўленні, танцы і рытмічная
музыка, характэрныя для цыркавых прадстаўленняў, дапамагаюць усталяваць прамы дыялог
як з дзецьмі, так і дарослымі, выклікаючы пачуцці спакою, радасці і згоды.
У
сваім пасланні кардынал Вэльё падкрэсліў прызнанне, з якім Касцёл глядзіць на артыстаў
цырка з ўсяго свету. Іерарх адзначыў намаганне цыркаў, працуючых у краінах, дзе ідуць
войны і трывае насілле, вярнуць людзям пачуццё міру, весялосці і радасці. Ён нагадаў
словы папы Францішка, аб тым, што ў сучасным свеце, які адзначаецца напружанасцю і
няроўнасцю, а нярэдка эгаізмам і індывідуалізмам, існуе патрэба ўбачыць святло надзеі.
Менавіта гэта, на думку старшыні Папскай рады пастырства эмігрантаў і падарожнікаў,
можа даць сучаснаму чалавеку свет цырка.