19 красавіка папа
Францішак сустрэўся ў Ватыкане з Прэзідэнтам Рэспублікі Эквадор Рафаэлем Вісэнтэ Карэа
Дэльгада. Пасля сустрэчы са Святым Айцом палітыка прыняў кардынал Дзяржсакратар Тарчызіо
Бэртонэ. Зала Друку Апостальскай Сталіцы паведаміла, што падчас размоў, якія прайшлі
ў сардэчнай атмасферы, быў абмеркаваны ўклад Каталіцкага Касцёла ў розныя сектары
грамадскага жыцця краіны. Была адзначана важнасць шчырага і пастаяннага дыялогу паміж
Касцёлам і дзяржавай ў адказе на асноўныя выклікі, якія стаяць перад грамадствам.
Акрамя таго, падкрэслівалася цэнтральная роля сацыяльнай справядлівасці і каштоўнасць
салідарнасці і субсідыярнасці ў пошуку агульнага дабра. Падчас сустрэч былі абмеркаваны
актуальныя тэмы, якія існуюць у рэгіёне, асабліва павага да карэнных народаў і іх
культуры, а таксама пытанні аховы навакольнага асяроддзя.