Mesazh i Këshillit Papnor për Emigrantët dhe Endacakët në Ditën Botërore të Cirkut:
të ruhen vlerat karakteristike të artistëve
Nesër, kremtohet Dita Botërore e Cirkut, organizuar nga Federata ndërkombëtare përkatëse,
me patronazhin e Princeshës Stefani të Monakos. Me këtë rast, Këshilli Papnor i Baritorisë
për Emigrantët dhe Endacakët i dërgon Federatës së Cirkut një mesazh, ku, duke kujtuar
audiencën e Benediktit XVI me artistët e cirkut, në dhjetor të vitit 2012, shpreh
mirënjohjen e Kishës për shoqatat e cirkut në të gjithë botën. Në atë rast, Papa deshi
të nënvizojë – thuhet në mesazh – se, përmes shfaqjeve, lojrave dhe koreografive,
nën ritmin e muzikës e të valles, përmes aftësisë së jashtëzakonshme atletike dhe
artistike, cirku krijon mundësi komunikimi ndërmjet të mëdhenjve e të vegjëlve, duke
zgjuar ndjenja miqësie e duke siguruar një argëtim të qetë, për të cilin ka shumë
nevojë njeriu bashkohor. Dikasteri vatikanas falenderon më pas, ata artistë cirku,
që me karovanën e tyre, me guxim e bujari, shkojnë në vende, ku ka luftë, dhunë, ose
fatkeqësi natyrore, për t’u ofruar njerëzve, që vuajnë – sidomos fëmijëve dhe të moshuarve
– çaste paqeje e gëzimi. Në një botë, plot tensione e pabarazi – përfundon mesazhi
– plot egoizëm e individualizëm, “kemi nevojë të shohim dritën e shpresës e t’i japim
vetes shpresë”, siç tha Papa Françesku në homelinë e fillimit të shërbimit të tij
pjetrin (19 mars 2013). Duhet të marrim guxim e ta shprehim mirësinë dhe ëmbëlsinë
– siç vëren gjithnjë Papa. Dje, tendat e cirkut në mbarë botën u hapën për vizitorët,
për të dëshmuar ato vlera, që kanë karakterizuar gjithmonë traditën e artistëve të
cirkut, si dashuria për familjen, kujdesi për të vegjlit e për të gjymtuarit, vëmendja
ndaj të sëmurëve, vlerësimi i të moshuarve dhe i përvojës së tyre jetësore, dialogu
ndërmjet brezave, ndjenja e miqësisë, aftësia për të punuar si një skuadër e vetme.