Святы Айцец: Бог – гэта Асоба, а не “распыленая” субстанцыя
Мы верым у Бога, які
ёсць Айцом, Сынам і Святым Духам, нагадаў Францішак 18 красавіка падчас Эўхарыстыі
ў капліцы Дома св. Марты. У сваёй гаміліі Папа адзначыў, што для многіх людзей Бог
з’яўляецца абстрактным паняццем, чымсьці накшталт “распыленай” субстанцыі, якая прысутнічае
ў нейкай меры паўсюль і невядома чым з’яўляецца – гэдакім “Богам-спрэем”. Святы Айцец
звярнуў увагу, што менавіта ў абліччы такога ўспрыняцця хрысціяне павінны моцна ўсведамляць,
што вераць у Бога-Асобу. Многія людзі, заўважыў Папа, заяўляюць аб сваёй веры ў Бога.
“Але ў якога Бога ты верыш?”, - паставіў пытанне Францішак і запрасіў кожнага шчыра
адказаць на яго. Пантыфік заклікаў не апускаць рукі на шляху веры, нягледзячы на грахі,
якія на ім здараюцца. “Пан нас прабачае, калі просім прабачэння, і гэта дазваляе пастаянна
рухацца наперад”, - сказаў Святы Айцец.
Францішак падкрэсліў, што вера, якая
нараджаецца падчас сустрэчы з Хрыстом, дае такую радасць і спакой, якіх не можа прапанаваць
гэты свет. Таму, паводле Папы, трэба прасіць Бога, каб даў магчымасць узрастаць у
веры, якая развіваецца дзякуючы маленькім штодзённым сустрэчам з Езусам.