Ferr në Teksas: shpërthen një impiant plehrash kimike. Papa kërkon lutje për viktimat
Pas atentatit të Bostonit dhe letrave me ricinë, Amerika përballon një faqe tjetër
të vështirë të historisë së vet: një shpërthim i fuqishëm në një impiant plehrash
kimike, në Teksas, e shndërroi qendrën e vogël në një “zonë lufte”. Akoma nuk dihet
numri i saktë i viktimave. Thuhet nga 5 në 15 vetë, por mediat amerikane folën për
60-70 të vrarë. Së paku, 160 të plagosur e të djegur janë çuar me urgjencë në spitalet
e zonës. Në një tweet, sot paradite, Papa Françesku shkruan: “Ju kërkoj të bashkoheni
me mua në lutje për viktimat e shpërthimit në Teksas e për familjet e tyre”. Duket
se tragjedia u shkaktua nga zjarri i ndezur brenda fabrikës, në periferi të qytezës
West, nga e cila merr emrin impianti. Flakët u përhapën me shpejtësi në disa serbatorë,
ku mbaheshin lëndë kimike për trajtimin e plehut. Shpërthimi ishte kaq i fuqishëm,
saqë zona përreth e ndjeu si të ishte një tërmet prej 2,2 ballësh, i cili shembi rrafsh
me tokën 50-60 shtëpi. Njerëzit janë larguar nga shtëpitë e tjera e janë mbyllur të
gjitha pikat e furnizimit me gaz. Nuk dihet mirë shkaku i rënies së zjarrit, por hetimet
e para vunë në dukje se flaka nuk është vënë qëllimisht. Tani është shpallur alarmi
për renë toksike, që po përhapet në zonë.