Իրանի Մէջ Տեղի ունեցած Երկրաշարժը Զգալի Դարձաւ Փաքիստանի, Հնդկաստանի եւ Միջին Արեւելքի
մէջ
Ուժգին երկրաշարժ մը հարուածեց հարաւարեւելեան Իրանը եւ զգալի դարձաւ Փաքիստանի, Հնդկաստանի
եւ Միջին Արեւելքի մէջ: 7.8 աստիճան ուժգնութեամբ երկրաշարժին կեդրոնը կը գտնուէր Փաքիստանի
հետ սահմանին մօտ գտնուող Խաշ քաղաքին մօտ: Զոհերու մասին հակասական տեղեկութիւններ
հաղորդուեցան: Իրանեան պետական պատկերասփիւռի կայանը հաղորդեց, որ հինգ զոհ արձանագրուած
է, եւ հերքեց իրանեան «Ֆարս» լրատու գործակալութեան այն լուրը, թէ 40 զոհ եւ 8650 վիրաւոր
արձանագրուած է: Մէկ բան յստակ է, որ Իրանը հարուածած երկրաշարժը 40 տարուան ընթացքին
իր տեսակին մէջ ամէնէն հզօրն էր: Իրանեան անանուն կառավարական աղբիւր մը «Ռոյթըրզ» լրատու
գործակալութեան յայտնեց, որ «հարիւրաւոր զոհեր կը սպասենք»: Փաքիստանի մէջ Իրանի հետ
սահմանին մօտ առնուազն հինգ զոհ արձանագրուեցաւ: Երկրաշարժը հարուածեց Սիսթան Պալուչիստան
նահանգը` շուրջ 180 հազար բնակչութիւն ունեցող Խաշ քաղաքին եւ 250 հազար բնակչութիւն
ունեցող Սարաւան շրջանին մօտ: Վերջինս կը բաղկանայ 1700 գիւղերէ, որոնց մէջ շէնքերը ցեխէ
կառուցուած են: Մօտակայ գիւղերու ժողովուրդը կը բնակի վրաններու մէջ, ինչ որ այն յոյսը
կը յառաջացնէ, որ զոհերուն թիւը փոքր ըլլայ: 10 ապրիլին 6.3 ռիխթըր աստիճանի երկրաշարժ
մը տեղի ունեցաւ հարաւարեւմտեան Իրանի մէջ, Պուշեհր հիւլէական կայանին մօտ` պատճառելով
37 զոհ եւ 850 վիրաւոր: Պուշեհրի կայանը օրին չէր վնասուած, իսկ կայանը կառուցած ռուսական
ընկերութենէն պաշտօնատար մը «Ռոյթըրզ»-ին յայտնեց, որ կայանը այս անգամ եւս անվնաս մնացած
է: