Кардынал Равазі пра “восем спосабаў” актывізаваць кантакты Папы з рэгіёнамі
Папа Францішак “рэалізуе
цудоўную формулу кожнага працэсу камунікацыі, калі суб’ект і пасланне адпавядаюць
адно аднаму”, лічыць кардынал Джанфранка Равазі. Ён сустрэўся з аўстрыйскімі журналістамі
15 красавіка. Вядома, адзначыў старшыня Папскай рады па культуры, Касцёл заўсёды патрабуе
тэалагічнага зместу. Паводле яго, Бэнэдыкт XVI у сваім навучанні зыходзіў як бы зверху,
ад прынцыпаў, а Францішак робіць адваротнае, ён пачынае знізу, і адтуль вядзе да гэтых
вялікіх прынцыпаў.
Многія задаваліся пытаннем, як гэта магчыма, што канклаў
– “сход кансерватыўных і старых кардыналаў” – з іроніяй адзначыў іерарх, зрабіў “такі
нечаканы выбар”. На яго думку, прычына ў тым, што большасць кардыналаў з’яўляюцца
кіраўнікамі дыяцэзій і дакладна ведаюць, якія патрабаванні там існуюць. А кожны Папа
ў пэўным сэнсе з’яўляецца такім адказам на турбуючыя пытанні. Кардынал Равазі адзначыў,
што Францішак – гэта сімвал знішчэння дыстанцыі паміж людзьмі. Аб гэтым сведчаць
яго нечаканыя тэлефонныя званкі да шматлікіх людзей рознага рангу. “Папа з’яўляецца,
безумоўна, фігурай сакральнай. Але калі ён падымае трубку – ён проста чалавек”, -
звярнуў увагу ватыканскі іерарх.
“Добрым крокам” назваў кардынал Равазі стварэнне
новай кардынальскай кансультатыўнай групы пры Пантыфіку. Гэта “восем спосабаў” актывізаваць
кантакты з рэгіёнамі, сказаў ватыканскі іерарх, спаслаўшыся на колькасць членаў групы.
Неўзабаве ён чакае канкрэтных зменаў. “Гэта добра, што ўсё гэта здарылася, таму я
лічу, што Рымская Курыя будзе рэфармавана”, - заявіў кардынал.