Жыцця не трэба “прыхарошваць”,
калі справы ідуць кепска, паколькі гэта азнака недаверу да Бога. Хрысціянін, наадварот,
павінен прымаць тое, што з ім адбываецца, усе ўрокі жыцця, звярнуў увагу папа Францішак
падчас ранішняй св. Імшы 13 красавіка ў капліцы Дому св. Марты. Святы Айцец спаслаўся
на чытанне Дзеяў Апосталаў, у якім гаворыцца аб узаемных нараканнях у першай хрысціянскай
супольнасці. “Першае, што яны робяць, гэта шэптам кажуць адзін супраць аднаго”, -
заўважыў Папа. “Але гэта не прыводзіць да якога-небудзь рашэння”, - дадаў ён. Толькі
апосталы адрэагавалі правільна, яны паклікалі вучняў, каб паразмаўляць з імі. І гэта
першы крок, заўважыў Францішак, “калі існуюць цяжкасці”, трэба са шчырасцю размаўляць
і “ніколі не хавацца”. “Мы не павінны баяцца праблем: сам Езус сказаў сваім вучням:
“Гэта Я, не бойцеся. Я ёсць”, - нагадаў Пантыфік. “У цяжкасцях жыцця, праблемах, новых
рэчах, якія мы павінны прыняць, Пан знаходзіцца побач. Мы можам, канешне, памыліцца,
але Ён заўсёды блізка і кажа: “Ты памыліўся, вярніся на правільны шлях”, - дадаў Святы
Айцец.
Папа запрасіў “не баяцца, не прыхарошваць жыцця, прымаць яго такім,
якое яно ёсць і спрабаваць вырашыць праблемы, як гэта рабілі апосталы, шукаць сустрэчы
з Езусам, які заўсёды побач нас, нават у самыя цёмныя моманты жыцця”.