Новы сакратар ватыканскай дыкастэрыі: законнікі павінны вяртацца да сваёй тоеснасці
Законнікі павінны
зноў і зноў вяртацца да сваёй тоеснасці. Толькі ў гэтым выпадку будуць як св. Францішак
сведкамі Хрыста для Касцёла і ў Касцёле, - заявіў арцыбіскуп Хасэ Радрыгес Карбала,
новы сакратар Кангрэгацыі па справах Інстытутаў кансэкраванага жыцця і Таварыстваў
апостальскага жыцця. Былы генерал францішканскага ордэна падзяліўся сваім бачаннем
абнаўлення рэлігійнага жыцця з Ватыканскім радыё. “Кансэкраванае жыццё, - сказаў арцыбіскуп
- павінна ўсцяж вяртацца да сваёй ідэнтычнасці, вяртацца, а не перагледаць яе. Вяртацца,
каб прысвойваць яе сабе зноў і зноў нанова. Мы законнікі павінны служыць Касцёлу,
жыць з Касцёлам, але заўсёды як законнікі. Гэта адзіны спосаб, якім мы можам дапамагчы
іншым. Таму мы павінны быць верныя нашай ідэнтычнасці. І такім чынам мы будзем таксама
вернымі Хрысту, Які паклікаў нас, і таксама сучаснаму чалавеку, да чаго заклікаў нас
ІІ Ватыканскі Сабор”, - заявіў новы сакратар Кангрэгацыі па справах Інстытутаў кансэкраванага
жыцця і Таварыстваў апостальскага жыцця.
Святы Айцец 6 красавіка прызначыў
а. Хасэ Радрыгес Карбала, генерала Ордэна францішканаў, новым сакратаром ватыканскай
дыкастэрыі. Гэта першае прызначэнне, якое папа Францішак зрабіў у Рымскай курыі.