Takime shpirtërore në Kishën katolike të Gjakovës nën udhëheqjen e dom Prekë Lazrajt
Në kuadër të Vitit të Fesë, të cilin që nga tetori i vitit të kaluar po kremtohet
në mbarë botën katolike, gjatë kësaj jave, bashkësia Kishtare e Shën Pjetrit e Palit
Apostuj e Gjakovës ka organizuar një seminar meditimesh mbi Fjalën e Zotit për të
ndihmuar përtëritjen e përforcimin e besimtarëve në fenë në Jezu Krishtit Zot e Shpëtimtar.
Viti i Fesë duhet të na ndihmojë për t’u rrënjosur në njohurinë e figurës së
Jezu Krishtit, pra të përmbajtjes së Ungjillit, sepse të krishterët janë të thirrur
të japin një dëshmi të bindur e të qartë, dëshminë e dashurisë e të vëllazërimit që
buron nga fakti që Zoti na do, na fal e shëlbon dhe vazhdon të na udhëheq çdo ditë
përmes Fjalës së Tij Hyjnore Jetëdhënëse. Gjatë meditimeve të këtyre ditëve drejtuar
pjesëmarrësve në Kishën e Shën Pjetrit e Palit Apostuj, dom Prekë Lazraj i nxiti besimtarët
katolikë të marrin çdo ditë në dorë Shkrimin Shenjtë, Biblën e në zhyten në thellësitë
e Fjalës që shëron zemrat nga mëkati dhe e keqja e na pajton njëri me tjetrin e së
bashku me Hyjin Atë. Viti i Fesë ka pikërisht këtë qëllim, të kontribuojë për progresin
e fesë e të vëllazërimi. Nuk mund të ecet në udhën e vërtetë të krishterë, duke
injoruar krizën e fesë, që po kalojnë zona të tëra të trevave shqiptare, ndërmjet
të cilave, ata që e pranuan të parat kumtimin e Ungjillit e ku jeta e krishterë lulëzoi
në shekuj. Dom Preka theksoi nevojën e përshpirtërisë e njëkohësisht, edhe
varfërinë shpirtërore të shumë njerëzve, që jetojnë pranë nesh, në kohën tonë. Por
nga ana tjetër, nuk mund të mos njihen edhe shenjat e shumta, që vërtetojnë se
njeriu ka gjithnjë nevojë për jetë shpirtërore, gjë që duket në mënyra nga më të ndryshmet.
Pasuria shpirtërore e shumë prej bashkëkohësve tanë, ndihmon ata njerëz që nuk e perceptojnë
më si humbje mungesën e Zotit në jetën e tyre, e kjo është sfidë për gjithë të krishterët. Në
këto rrethana, ne, që besojmë në Krishtin, na kërkohet të rikthehemi tek themelorja,
tek zemra e fesë sonë, tek dëshmimi, së bashku, i Hyjit të gjallë deri në skajet më
të thella të botës shqiptare, e kështu t’i ofrojmë Vendlindjes sonë Dritën e Krishtit
të Gjallë. Për këtë qëllim, Famullitari i kësaj bashkësie kishtare, françeskani
atë Ndue Kajtazi ka ftuar për priftin dom Prekë Lazraj, drejtor i Radio Marisë së
Shqipërisë e prej vitesh ideator i këtyre takimeve shpirtërore. Mbi ecurinë e takimeve
shpirtërore me besimtarët katolikë të Gjavokës, të dëgjojmë eprorin e kuvendit
françeskan e famullitarin e Bashkësisë Kishtare të Shën Pjetrit e Palit Apostuj, atë
Ndue Kajtazin.............