Ֆրանչիսկոս Սրբազան Քահանայապետի Գործունէութիւնը։

Նորին Սրբութեան խօսքը ''Papal Foundation''-ի անդամներուն։
Սրբազան Հայրը այսօր հինգշաբթի 11 ապրիլի առաւօտեան, (ժամը 11-ին) իր գրասենեակի մէջ ընդունեց Մոզամպիքի վարչապետը՝ Տիար Ալպէրթօ Գլէմէնդինօ Վագինօ-ն, ապա ժամը 11.30-ին , ունկնդրութիւն շնորհեց, Կարտինալ Ճուզեփփէ Պէթորէի գլխաւորած՝ Իտալիոյ Թոսքանա Մարզի եպիսկոպոսական համահաւաք դասի անդամ 9 եպիսկոպոսներուն, եկած՝ կատարելու իրենց հնգամեայ կանոնական այցելութիւնը Ս Պետրոսի յաջորդին։ Նորին Սրբութիւնը ապա ժամը 12.30-ին Գլէմէնդինա սրահին մէջ ունկնդրութիւն շնորհեց ''Papal Foundation'' բարեգործական կազմակերպութեան 120 անդամներուն։
''Papal Foundation'' կազմակերպութեան անդամներուն ուղղած իր խօսքին մէջ, Սրբազան Հայրը շնորհակալութիւն յայտնեց անոնց 25 տարուայ տարած աշխատանքին համար, ի սպաս եկեղեցւոյ. ու նաեւ անոնց ''Աստուծոյ ժողովուրդին'' պահանջներուն հոգալու համար։ Ձեր գործունէութիւնը - ըսաւ Սրբազան Հայրը - '' Ս. Պետրոսի յաջորդին հետ հոգեւոր զօրակցութիւն մըն է՝՝, խնդրեց անոնցմէ որ աղօթեն իրեն համար ու ապա ջամբեց իր առաքելական օրհնութիւնը ։