Кардынал Кох аб адносінах Каталіцкага Касцёла з пратэстантамі
Карыднал Курт Кох,
старшыня Папскай рады спрыяння хрысціянскаму адзінству, у інтэрв’ю Ватыканскаму радыё
расказаў аб стане кантактаў Каталіцкага Касцёла з пратэстантамі. Ён паінфармаваў,
што Міжднародная камісія па тэалагічным дыялогу сумесна з Сусветнай лютэранскай федэрацыяй
распрацавала спецыяльны дакумент пад назвай “From conflict to communion” (Ад канфлікту
да адзінства) у якім называецца тое, што было асягнута паміж двума Цэрквамі на працягу
апошніх 50-ці гадоў, прызнаецца ўзаемная віна і выказваецца надзея на лепшую будучыню.
Кардынал
выказаўся таксама наконт рымскай сустрэчы на тэму пяцідзесятнікаў, якая праходзіла
ў Вечным горадзе 9-11 красавіка. Ён нагадаў, што сёння гэтыя супольнасці займаюць
другое пасля католікаў месца ў свеце па колькасці вернікаў. “Таму трэба казаць аб
вялікім уплыве, які яны маюць у хрысціянстве. Для экуменізма, гэта зусім новая сітуацыя”,
- адзначыў старшыня ватыканскай дыкастэрыі. Іерарх лічыць, што трэба ўважліва назіраць
за развіццём пяцідзесятнікаў у Лацінскай Амерыцы, Афрыцы, Азіі і Еўропе, каб весці
разважанне аб спосабах экуменічнага дыялогу з імі. Паводле яго, трэба задумацца, чаму
вернікі пакідаюць Каталіцкі Касцёл і далучаюцца да гэтых груп. Адказу, на думку кардынала
Коха, трэба шукаць у тэалагічным разважанні над роляй Святога Духа ў жыцці супольнасці.