Papa Françesku: duke dëgjuar Zotin e duke ndjekur udhën e Jezusit bëhemi të lirë e
të lumtur
Kur dëgjojmë Zotin bëhemi të lirë e Fjala e Tij na jep atë lumturi, që propozimet
e ndryshme të botës nuk mund të na e japin kurrë. Kështu tha Papa Françesku në meshën
e mëngjesit, kremtuar, si zakonisht, në kapelën e Shtëpisë së Shën Martës në Vatikan,
në praninë e disa punonjësve të gazetës “L’Osservatore Romano”. “T’i bindesh Hyjit
– pohoi Ati i Shenjtë – do të thotë ta dëgjosh, ta kesh zemrën e hapur për të shkuar
drejt udhës, që na tregon Ai vetë. E kjo na bën të lirë”. T’i bindesh Zotit, vazhdoi
Papa Bergolio, do të thotë ta dëgjosh zërin e Tij, siç bëri Pjetri, që u tha farisejve
dhe skribëve: “Unë bëj ç’më thotë Jezusi, jo ç’doni ju të bëj unë”. Gjatë jetës,
theksoi Ati i Shenjtë, dëgjojmë edhe fjalë, që nuk vijnë nga Jezusi e nga Zoti. Nganjëherë
dobësia jonë shpirtërore na shtyn drejt një jete “të dyfishtë”: njëra ushqehet nga
Fjalët e Krishtit, tjetra, nga fjalët e botës. E nganjëherë, kur e dëgjojmë Jezusin,
ata, që nuk janë dakord me Të, zemërohen keqas e udha e të krishterit të mirë përfundon
me persekutim. Megjithatë, nënvizoi Papa Françesku, shumë e dëgjojmë Jezusin e jo
pak persekutohen, por me jetën e tyre dëshmojnë vullnetin për t’iu bindur Zotit, për
të përshkuar udhën, që u tregon Krishti. Kjo është edhe këshilla e Liturgjisë
së sotme, “Të shkojmë në udhën e Jezusit”. Fjala është të mos i dëgjojmë propozimet
e botës, propozimet e mëkatit e të kompromisit, që na largojnë nga Zoti. Na ndihmon
Shpirti Shenjt, siguroi Papa. Është pikërisht Shpirti Shenjt, që na jep forcë për
të ecur në udhën e drejtë, por duhet t’i kërkojmë Atit Qiellor të na japë guximin
për të thënë: “O Zot, jam mëkatar, nganjëherë u bindem gjërave të botës, por dua të
të bindem Ty, dua të eci në udhën Tënde”. E kur nuk e bëjmë këtë, të kërkojmë falje,
përfundoi Ati i Shenjtë, e Zoti do të na falë, sepse Ai është shumë i mirë.