Մարոնի համայնքի Պշարա Ռայի պատրիարքը երէկ հանդիպում մը ունեցաւ Ֆրանսայի նախագահ Ֆրանսուա
Հոլլանտի հետ: Հանդիպումին ընթացքին Հոլլանտ դրուատեց Ռայի պատրիարքին ճիգերը, ինչպէս
նաեւ հաստատեց, որ Ֆրանսա կառչած կը մնայ Լիբանանի ապահովական կայունութեան եւ քաղաքացիներուն
ազատութեան: Հոլլանտ մաղթեց, որ լիբանանեան քաղաքական տարբեր ուժերուն միջեւ փոխըմբռնում
հաստատուի: Հոլլանտ բարձր գնահատեց նաեւ հանրապետութեան նախագահ զօր. Միշել Սլէյմանի
եւ Ռայի պատրիարքին ի գործ դրած ջանքերը` Լիբանանի եւ Ֆրանսայի միջեւ պատմական յարաբերութիւնները
պահպանելու առումով: Ան մաղթեց, որ Լիբանան կարենայ դուրս գալ իր դիմագրաւած զանազան
մարտահրաւէրներէն եւ կարենայ տոկալ սուրիացի գաղթականներուն պարտադրած ծանր կացութեան: Իր
կարգին, Ռայի պատրիարքը շեշտեց, որ ինքնութիւնը պահպանուի այն երկիրներուն, ուր քրիստոնեաները
2000 տարիէ ի վեր ապրած են ու կը շարունակեն ապրիլ եւ ուր ձգած են իրենց մարդկային արժէքներու
դրոշմը: Ռայի պատրիարքը շնորհակալութիւն յայտնեց Ֆրանսայի` Լիբանանի նկատմամբ ցուցաբերած
իր զօրակցութեան համար եւ շեշտեց երկու երկիրներուն միջեւ պատմական յարաբերութիւնները
պահպանելու կարեւորութիւնը: Ռայի պատրիարքը մաղթեց, որ Ֆրանսա շարունակէ զօրակցիլ
Միջին Արեւելքի խաղաղութեան եւ մարդկային իրաւունքներուն: Միւս կողմէ, «Նահար» օրաթերթին
համաձայն, Ռայի պատրիարքը, որ նախանցեալ երեկոյեան հանդիպում մը ունեցած էր Ֆրանսայի
արտաքին գործոց նախարար Լորան Ֆապիւսի հետ, քննարկած էր լիբանանեան եւ շրջանային իրադարձութիւններն
ու երկկողմանի յարաբերութիւնները: Հանդիպումին ընթացքին Ֆապիւս շեշտած էր, որ Ֆրանսա
նախանձախնդիր է Լիբանանի կայունութեան, դիմադրողականութեան եւ գերիշխանութեան: Ֆապիւս
ողջունեց Թամմամ Սալամի վարչապետ նշանակումը` աւելցնելով, որ անիկա դրական ցուցանիշ մըն
է մօտիկ ապագային երեսփոխանական ընտրութիւնները կատարելու, այլ խօսքով` երկրին մէջ ժողովրդավարութիւն
հաստատելու: