Лідэр нямецкіх лютэран напісаў у ватыканскай газеце пра Рэфармацыю
Старшыня Рады Евангелічна-Лютэранскай
Царквы Германіі стаў аўтарам аднаго з артыкулаў у сённяшнім нумары ватыканскай газеты.
Нікалаус Шнайдэр напісаў пра значэнне святкавання 500-годдзя Рэфармацыі, якое адбудзецца
ў 2017 г. Пратэстанцкі лідэр выказаў думку, што гэта дата з’яўляецца “глабальнай падзеяй”,
таму і павінна адзначацца адпаведным чынам. “У 2017 г. мы будзем адзначаць не гадавіну
з дня нараджэння нашай Евангелічнай Царквы, (...) але цэлебраваць той факт, што Евангелле,
з Рэфармацыяй, знайшло новы спосаб здабыць чалавека”, - напісаў Шнайдэр на старонках
“L’Osservatore Romano”.
Юбілей стане таксама нагодай, каб паглядзець на цёмныя
бакі Рэфармацыі, лічыць кіраўнік Лютэранскай Царквы, “на жорсткасць і разбурэнні,
выкліканыя самім Лютэрам і ўсёй Рэфармацыяй ў яе нецярпімасці”. “Мы таксама хацелі
б выправіць класічны вобраз “героя” Марціна Лютэра, які быў, аднак, як відаць з апошніх
даследаванняў, асобай амбівалентнай: нягледзячы на свае выдатныя магчымасці і ўстойлівае
тэалагічнае натхненне, быў таксама пужаюча сварлівы і ганебна антыяўрэйскі”, - напісаў
Шнайдэр. Трэба сказаць праўду, каб залячыць тыя раны, якія нанесла Рэфармацыя, таму
500-годдзе можа стаць “святам усеагульнага прымірэння”, лічыць ён.