87 տարեկանին երէկ կեանքէն հեռացաւ Բրիտանիոյ նախկին վարչապետ Մարկրիթ Թաչըրը, որ ծանօթ
էր «Երկաթէ տիկին» մակդիրով: Ան մահացած է սրտի կաթուածի պատճառով: 2002-էն ի վեր
Թաչըր քանի մը անգամ սրտի տագնապներ անցուցած է, սակայն այս անգամ ատիկա «Երկաթէ տիկին»-ին
համար մահաբեր եղած է: Ժան տ՛Արք, Էլիզապէթ Ա., Մայր Թերեզա, Ինտիրա Կանտի. աշխարհը
փոխած այս կիներու անուններուն կողքին միշտ ալ իր անունը եղած է: 1979-1990 թուականներուն
Բրիտանիան իբրեւ վարչապետ կառավարած այս կինը իր խստաբարոյ եւ կարծր կեցուածքին համար
ստացած է «Երկաթէ տիկին» մակդիրը: Ան յաջողեցաւ կերտել միջազգային քաղաքականութեան իր
դարաշրջանը եւ յաւերժանալ իբրեւ 20-րդ դարու մեծագոյն ղեկավարներէն մէկը: