Në Nigeri nis diskutimi për faljen e anëtarëve të grupit fanatik islamik “Boko Haram”,
përgjegjës për vrasjen e qindra njerëzve në Veri të vendit. Propozimin e bëri sulltani
i Sokotos, një nga prijësit më të rëndësishëm islamikë nigerianë. Pas këtij propozimi,
presidenti Godluk Xhonatan ngriti një komision specialistësh për të studiuar termat
e amnistisë. Në diskutim merr pjesë edhe Kisha Katolike, përmes kryeipeshkvit të Abuzhës,
kardinalit Onaiekan, i cili në mesazhin e tij të Pashkëve, titulluar enkas “Mëshira
e Zotit e ndjesa e njeriut”, bën një analizë të kujdesshme të situatës. “Shteti duhet
të dijë ta përdorë me shumë kujdes pushtetin e vet, kur është fjala për të falur kriminelët,
shkruhet në mesazhin, rimarrë nga agjencia Fides. Hirësia e tij kujton se për të
falur, duhen përmbushur dy kushte; pendimi i sinqertë i fajtorit dhe dëmshpërblimi.
Në këtë atmosferë përpjekjesh të përbashkëta, përfundon, kërkimi i amnistisë duket
i mundshëm, madje dhe i nevojshëm. Në çdo konflikt vjen një kohë, kur duhet nisur
dialogu, për të arritur në zgjidhjen përfundimtare. Me sa duket, për Boko Haramin
kjo kohë ka arritur.