Mëshira Hyjnore. Imzot Bart: në këtë ditë rrjedhin hiret e të Ngjallurit.
Kisha katolike kremtoi dje, e Diela e dytë e Pashkëve, Festën e Mëshirës Hyjnore,
themeluar 13 vjet më parë nga Papa Vojtila. Mbi rëndësinë e kësaj feste flet, në mikrofonin
tonë, imzot Jozef Bart, rektor i kishës romake të Shpirtit Shenjt në Sasia,
që i Lumi Vojtila ia kushtoi kultit të Mëshirës Hyjnore:
Përgjigje:
- Festa e Mëshirës Hyjnore lindi pikërisht nga përshpirtëria e Shën Faustina
Kovalskës, së cilës vetë Krishti, gjatë vegimeve, i kërkoi që e diela e parë pas Pashkëve
të kremtohej si e Mëshirës Hyjnore, sepse Mëshira Hyjnore buron nga Mundimet, Vdekja
e Ngjallja e Krishtit. Pikërisht pak ditë më parë, Papa i ri, Françesku, gjatë bekimit
të Pashkëve Urbi et Orbi, e shpjegoi në mënyrë të përkryer këtë të vërtetë. Jezusi
u ngjall, brohoriti Papa, ka shpresë edhe për ty, nuk je më nën zgjedhën e mëkatit,
të së keqes! Fitoi dashuria, fitoi mëshira! Mëshira e Zotit fiton gjithmonë, është
më e fortë se e keqja e edhe se vetë vdekja; mund ta shndërrojë jetën tonë, mund t’i
kthejë në lulishte, shkretëtirat e zemrës sonë.
Pyetje: - Kulti
i Mëshirës Hyjnore mbetet i lidhur ngushtë me figurën e rregulltares mistike polake,
Faustina Kovalska, lindur në fillim të shekullit të kaluar e vdekur në moshën 33 vjeçe,
më 1938. Sot përshpirtëria e rregulltares, lartuar në nderimet e elterit nga Papa
Gjon Pali II, është përhapur në shumë vise të botës. ...
Përgjigje: -
Ishte i Lumi Gjon Pali II që, më 30 prill 2000, gjatë kanonizimit të Shën Faustinës,
e para shenjtore e Jubileut të Madh, e themeloi për të gjithë Kishën të Dielën e Mëshirës
Hyjnore, ditë në të cilën rrjedhin vërtet hiret e Krishtit të Ngjallur, nga atributi
i tij më i madh, ai i Mëshirës. Çdo njeri ka nevojë për Mëshirën Hyjnore, sepse ku
tjetër, përveçse në Mëshirën Hyjnore, mund të gjejnë strehë e shpresë njeriu e bota?
Pyetje: - Kush ishte Shën Faustina Kovalska? Përgjigje:
- Motër Faustina Kovalska jetoi 33 vjet. Vdiq më 5 tetor 1938. Shën Faustina
është dhuratë e Zotit për kohën tonë, është dhuratë e trojeve të Polonisë për mbarë
Kishën. Jezusi i besoi mistikes polake detyrën t’ia përcillte mbarë njerëzimit mesazhin
e Mëshirës Hyjnore. Misioni i motër Faustinës na kujton të vërtetën mbi Mëshirën Hyjnore,
sepse e dimë që ajo është një e vërtetë e zbuluar në Shkrimin Shenjt. Motër Faustina
na e kujton këtë të vërtetë në forma të reja, që i janë transmetuar nga vetë Jezusi
gjatë dukjeve të tij. Mendoj sidomos për nderimin e figurës së mëshirës Hyjnore, që
vjen nga vegimi i 22 shkurtit 1931. Pastaj për orën e Mëshirës, që ia kërkoi vetë
Jezusi, për lutjen që Krishti ia mësoi motër Faustinës, që t’ ia drejtonte Mëshirës
së tij Hyjnore. Mendoj, pastaj, për festën e Mëshirës Hyjnore, themeluar nga Papa
Gjon Pali II gjatë kanonizimit të Motrës Faustina, që Kisha e kremton si "E Diela
e Mëshirës Hyjnore". Mendoj edhe për përhapjen këtij kulti, që sot vijon përmes "apostujve
të Mëshirës Hyjnore".
E dje, pikërisht në përkim me të Dielën e Mëshirë
Hyjnore, Papa Françesku filloi detyrën e tij si Ipeshkëv i Romës. Prandaj mund të
themi se kjo e Diel u kremtua në një atmosferë të posaçme. Kur Françesku ulej
në Katedrën e Shën Pjetrit, mijëra besimtarët, që u mblodhën rreth Papës së ri në
Sheshin e të Lumit Gjon Pali II, i lartuan një lutje korale Mëshirës Hyjnore për papninë
e tij. E u nisën të ngushëlluar, duke kujtuar porosinë e fundit të homelisë, për të
qenë të mëshirëshëm sepse:“Kështu do ta ndjejmë ëmbëlsinë e Hyjit, përqafimin e
Tij e, edhe ne do të jemi më të mëshirshëm, më të durueshëm, më të aftë për të falur
e për të dashur”.E Diela e djeshme u kujtoi të gjithëve edhe se Provania Hyjnore
deshi që Papa Vojtila t’i mbyllte sytë për dritën e kësaj toke pikërisht natën e kësaj
feste. Misteri i dashurisë përdëllyese ishte gjithnjë në qendër të papnisë së Atij
që shkroi Enciklikën Dives in misericordia, duke i shpjeguar botës se kulti
i Mëshirës Hyjnore nuk është devocion i dorës së dytë, por përmasë e fesë dhe e lutjes
të të krishterit.