Kardinali Amato shpalli të Lum atë Kristoforin e Shën Katerinës, dëshmitar i dashurisë
së krishterë në Spanjën e 1600-ës.
Kardinali Anxhelo Amato, prefekt i Kongregatës për Çështjet e Shenjtorëve, kryesoi
dje paradite, në Katedralen e Kordovës, në Spanjë, ritin e lumnimit të atë Kristoforit
të Shën Katerinës, themelues i Kongregatës spitalore të Jezusit të Nazarenit. Është
i lumi i parë i papnisë së Papës Françesku. Atë Kristofori lindi në Mérida, në
juglindje të Spanjës, më 25 korrik 1638; e kreu shtegtimin në udhët e kësaj bote,
më 24 korrik 1690. Ndërmjet këtyre dy datave, qe gjithnjë në kërkim të Zotit, duke
nisur nga mosha dhjetëvjeçare, kur trokiti në kuvendin e françeskanëve, për të vijuar
me shërbimin në Spitalin e Zojës së Dhimbshme, drejtuar nga Kongregata Fatebenefratelli,
me shugurimin meshtarak në moshën 24 vjeçare e me kapelaninë, në luftën 30 vjeçare
(1618-1648). Pas tmerreve të luftës, gjatë së cilës u rrezikua të vdesë nën bombat,
iu kushtua jetës vetmitare në shkretëtirë. U rikthye mes njerëzve, duke e kërkuar
Fytyrën e Krishtit, në fytyrat e të varfërve, të fshatarëve, të grave të poshtëruara,
të fëmijëve të braktisur, të të sëmurëve. Për ta lypi lëmoshë ditë-natë nëpër rrugët
e Kordovës. E kjo përvojë e çoi në themelimin e një Kongregate me frymë françeskane:
Kongregatës spitalore të Jezusit të Nazarenit si dhe spitalit me të njëjtin emër,
të Kordovës. Deshi t’i përngjante sa më shumë Jezusit, që mori mbi vete mundimet e
të tjerëve. Në spital i mjekonte të sëmurët falas, duke pritur me krahë hapur edhe
të sëmurët nga kolera, pa pyetur fare se mund të prekej edhe ai vetë nga kjo sëmundje
ngjitëse. E vdiq pikërisht nga kolera, më 24 korrik 1690, 52 vjeç, duke shtrënguar
fort në kraharor, Krishtin e Kryqëzuar. Ishte fjalëpakë, por njerëzit thoshin për
të: “Mësojmë shumë më tepër duke shikuar atë Kristoforin, që lyp lëmoshë rrugëve,
se duke dëgjuar një mori predikimesh”.